Tui hăng tơlơi pơtong glăi, bruă git gai, pơčrâo ba hơmâo pok pơhai tơpă, khut khăt mơ̆n, sa amăng plĕ; djop sang bruă kơnuk kơna prăp lui djơ̆, thâo tong ten tơlơi pơhing, hmao pơsir hăng ƀuh tañ hơdôm bruă mă soh glăi, djru ngă hơđong tơlơi kơđi čar laih anun pơkơjăp tui tơlơi đăo kơnang mơ̆ng mơnuih ƀôn sang. Amăng rơwang bruă laih rơgao, giong sem lăng amăng ping gah, bruă mă amăng tơring čar hơmâo ƀuh 12 mơta bruă soh sat ƀong kông ngăn.

Bruă hyu sem lăng ƀuh 10 mơta bruă ngă soh, jao kơ sang bruă tơhan sem kơđi tơña kiăng rơđah pioh tơgŭ kơđi. Lăp đing nao, tơring čar Dak Lak pơtum jŭ yap glăi, pơsir kơđi dŏ kaih, dŏ kơđông lu, pioh glăi sui thun blan, ngă rơngiă huač đôč prăk kăk kông ngăn. Gah kông ngăn sang bruă dŏ rơbêh, kiăng khom hơmâo hơdră pơsir tañ khut khăt tơdơi kơ pơmut glăi, đơ đam tơring čar dŏ hơmâo 4000 boh sang bruă; amăng anun dŏ 400 boh sang bruă rơbêh, kiăng pơsir tañ. Khua git gai ping gah tơring čar Dak Lak, ơi Lương Nguyễn Minh Triết, pơtrun hiăp brơi ngă tui djơ̆ tơpă tui anŏ kiăng “Ƀu dưi, ƀu khin, ƀu kiăng, ƀu gưt ƀong prăk la ôh”; pơtrut bruă pơtô hrăm pran jua tơpă, hiam kơ mơnuih apăn bruă ngă khua, ngă tui bruă thâo pơkrem, tơpă hnơ̆ng, laih anun pơsir khut khăt kông ngăn kơnuk kơna dŏ rơbêh hĭ.