VOV4.Jarai - Bruă sĭ gơnam giong anun brơi mă glăi prăk, anai jing bruă arăng pơƀlor mă đôč, hơmâo lu wơ̆t laih ƀơi hơdôm boh plơi pla, ngă lu mơnuih rơngiă prăk, hơmâo anom bruă pôr pơhing lăi pơthâo na nao laih. Samơ̆ bruă plư pleč anai phrâo hơmâo ƀơi plơi prong Buôn Ma Thuột, Dak Lăk.

Djă ƀơi tơngan gô̆ sañ hna añăm huăi tlep, huăi khiă, blơi rơngiă 650.000 prăk, samơ̆ mă yua mă ha wơ̆t đôč gô̆ tlok abih, yă H’Lý Niê, dŏ ƀơi ƀuôn Êrang, phường Khánh Xuân, plơi prong Buôn Ma thuột, tơring čar Dak Lăk, ƀit ƀiu či ur hia: “arăng pơƀlor kơ kâo”. Rơwang hrơi tơjuh anai, hơmâo mơnuih mut nao amăng plơi plĕ hră pơƀuh gơnam pioh yua amăng sang anŏ, ƀuăn tơdah ƀu klă gơñu ba glăi prăk. Ƀong ia bah, ñu blơi 3 mơta gơnam, hơmâo gô̆ huăi tlep, gô̆ áp suất, gô̆ hơtuk lẩu, samơ̆, aka ƀu hmao mă yua abih ôh, rơngiă giăm 5 klăk prăk laih:“Blung a arăng lăi gô̆ anai pơ siêu thị ƀu hơmâo ôh, bơ nua sĭ pơ anai lĕ 4 klăk 100 rơbâo prăk. Giong anun čơkơi anun lăi, 4 klăk 100 rơbâo prăk hơmâo pô či blơi mơn, tơdah blơi lĕ prăk huăi rơngiă ôh, kơñ ƀiă tla glăi abih. Giong anun truh gô̆ sañ hna añăm nua ñu 650.000 prăk. Ƀu pơmin arăng pơƀlor ôh. Aka ƀu đut dơ̆ anun ôh, kâo aka ƀu hmao pel lăng gơnam kâo blơi hiư̆m pă lơi, aka ƀu tla glăi prăk ôh, arăng đuăi laih, lơ̆m anun kah mơng thâo arăng pơƀlor”.

Gô̆ hna añăm huăi tlep hơmâo yua mă ha wơ̆t đôč tlok abih yơh.

Ăt jing pô blơi gơnam arăng sĭ pơ phường Khánh Xuân mơguah lơ 4/10, amai H’Nghiêm Niê, ƀơi ƀuôn Êrang ră ruai glăi, bruă sĭ mơdrô anai pioh kơ ƀing đah kơmơi đôč, ƀing đah rơkơi ƀu dưi mut nao ôh. Blung a, ñu blơi ia măm, ia rao pla, ia čơƀu boh sum ao hăng nua hơdôm rơbâo prăk, lêng kơ ba glăi prăk ôh. Truh yang hrơi dong, ƀing hyu mơdrô lăi gơñu amra sĭ gơnam pơmă hloh, laih anun ăt brơi glăi prăk kơ pô blơi mơn. Amai H’Nghiêm kơdăt đuăi glăi pơ plơi, čan 5 klăk prăk či blơi gơnam, giong anun tơhong lăng tui arăng đĭ rơdêh krua đuăi hĭ:“Ană plơi dŏ tơguan mơ̆ ƀu ƀuh arăng brơi glăi prăk, giong anun ƀing djru sĭ dŏ gah anăp ƀing gơñu kơdun glăi gah tlôn, giong anun gơñu đuăi abih. Gơñu apah hơdôm čô mơnuih pơprong, lăng kơdrưh hŭi biă, dŏ tơguan pơ anăp sang ƀong huă Thu Hương, giong anun pơdŭ gơnam đuăi abih, prăk gơñu ƀu brơi glăi lơi”.

Amai H’Nghiêm Niê ră ruai glăi bruă arăng plư ñu giăm 5 klăk prăk.

Ơi Y Hiệp Niê, Khua plơi Buôn Êrang, phường Khánh Xuân brơi thâo, hơdôm mơta gơnam ană plơi djă glăi lêng kơ ƀu klă soh, ƀu hơmâo hră pơ-ar ôh: “Kông ti, anom bơwih ƀon anai plư pleč, pơƀlor kơ ană plơi. Anai jing tơlơi ƀing ta kiăng răng kơđiăng mơn. Ăt kiăng anom apăn bruă, kông an hơduah ĕp, pơsir brơi bruă anai”.

Ơi Nguyễn Đình Chung, Khua Jơnum min mơnuih ƀon sang phường Khánh Xuân, plơi prong Buôn Ma Thuột brơi thâo, hmư̆ ană plơi lăi pơhmư̆, ƀing khua hơmâo nao lăng hlao, samơ̆ ƀing sĭ mơdrô đuăi laih. Tui hăng tơlơi hmư̆ hing blung a, bruă anai hơmâo năng ai 500 čô mơnuih amăng phường Khánh Xuân hăng hơdôm boh să Hòa Xuân, Hòa Khánh, Hòa Phú nao blơi. Pô blơi aset biă ñu lĕ 650.000 čô, bơ đa blơi truh pơ 9 klăk prăk.

Hơdôm pluh čô mơnuih ƀuôn Êrang rơ-añ biă bruă arăng pleč ƀlor kơ ƀing ñu.

Ƀing hyu sĭ gơnam hơmâo 2 čô đah kơmơi, 8 čô đah rơkơi, đĭ rơdêh prong pơgiăng gơnam mrô 60B-04422 hăng rơdêh ôtô 16 boh grê 60B-52809. Hlâo kơ anun, ƀing anai lăi pơthâo gơñu mă bruă gah Kông ti TNHH ISHIBA, nao pơ hơdôm anih hơmâo lu mơnuih kah hăng sang čơ, ƀơi anăp sang hră...plĕ hră ƀơi jơlan, iâu ană plơi nao lăng gơnam gơñu sĭ. Ơi Chung pơsit, bruă sĭ mơdrô anai ƀu hơmâo lăi pơthâo hăng gong gai plơi pla ôh:“Bruă anun soh biă mă yơh, yua dah sĭ gơnam hơget thơ khŏm hơmâo hră pơ-ar ngă bruă, ƀu djơ̆ pơƀuh gơnam giong sĭ tui anun ôh. Wơ̆t hăng lơ̆m ngă bruă tom Sang sĭ gơnam ƀong huă arăng kơtuă mơn, yua dah arăng nao apah mă lan sang ngă anih sĭ gơnam, gơñu ƀu thâo lơi arăng sĭ gơnam hơget, ƀu thâo arăng pơƀlor kơ ană plơi tui anun ôh. Ră anai, gah phường glăk git gai hơdôm anom apăn bruă, amăng anun phun ñu kông an hơduah ĕp, ngă rơđah tơlơi anai, ƀu pioh ană plơi hơmâo pô plư pleč, pơƀlor tui anun ôh”.

Hơdôm rơtuh čô mơnuih ƀơi plơi prong Buôn Ma Thuột, Dak Lăk glăk hơmâo arăng plư mă yua lăng gơnam gơñu sĭ, samơ̆ anai lĕ bruă pleč ƀlor đôč. Bruă anai ƀu djơ̆ phrâo hơmâo ôh, samơ̆ ăt hơmâo mơnuih arăng plư mơn, brơi ôh bruă wai lăng sĭ mơdrô hăng rơnuk rơnua amăng plơi pla ƀu kơjăp, lơ̆m hơmâo lu mơnuih tum pơƀut mơ̆ ƀu hơmâo pô ƀuh, ƀu hơmâo pô thâo pơgăn hĭ tañ./.

Công Bắc čih - Siu H’Mai: Pơblang