Jơnum min pơ ala mơnuih ƀôn sang tơring čar Dak Lak tal XI, rơwang thun 2026-2031 phrâo pơphun jơnum tal I. Jơnum anai pok blung brơi bruă mă mơng Jơnum min pơ ala mơnuih ƀôn sang tơring čar amăng rơwang ngă bruă phrâo. Jơnum tal anai, ƀing khua mua pơphun ruah: Khua mua pơprong, ƀing kơ-iăng khua Jơnum min pơ ala mơnuih ƀôn sang tơring čar, hơdôm anom bruă hăng Khua hơdôm anom bruă mơng jơnum min pơ ala mơnuih ƀôn sang tơring čar Dak Lak tal XI, rơwang thun 2026-2031.

Yă Cao Thị Hòa An, tŏ tui ngă Khua jơnum min pơ ala mơnuih ƀôn sang tơring čar Dak Lak tal XI, rơwang thun 2026-2031. Ơi Đỗ Thái Phong, ơi Từ Thái Giang hăng yă Phúc Bình Niê Kđăm hơmâo ruah ngă kơ-iăng Khua jơnum min mơnuih ƀôn sang tơring čar. Ơi Đỗ Hữu Huy, Ding kơna prap tui tlôn Ping gah gơnong glông, kơ-iăng Khua git gai Ping gah tơring čar hơmâo ruah ngă Khua Jơnum min mơnuih ƀôn sang tơring čar Dak Lak, rơwang thun 2026-2031; ƀing kơ-iăng Khua Jơnum min mơnuih ƀôn sang tơring čar hơmâo: ơi Đào Mỹ, ơi Nguyễn Thiên Văn, ơi Trương Công Thái hăng yă Hồ Thị Nguyên Thảo. Ơi Lương Nguyễn Minh Triết, Khua git gai Ping gah tơring čar Dak Lak rơkâo Jơnum min pơ ala mơnuih ƀôn sang tơring čar tañ hơđong anih anom mă bruă, pơhlôm ngă bruă hruaih, tŭ yua, klă hloh.