Nao jơnum hrŏm hơmâo khua mua gơnong bruă wai lăng sĭ mơdrô, anom bruă ĕp ngă hrŏm sĭ mơdrô hăng rơbêh 60 boh sang bruă bơwih ƀong huă, sĭ mơdrô, anom ngă ƀong hrŏm, ƀing pơpha hyu gơnam sĭ mơdrô ƀơi klâo boh tơring čar. Ƀơ mông jơnum, khua mua pơ ala kơ anom bruă sĭ mơdrô klâo boh tơring čar Dak Lak, Trà Vinh hăng Sóc Trăng hơmâo lăi pơthâo anŏ gêh găl, anŏ thâo hơmâo amăng bruă ngă hmua, pơkra ming gơnam sĭ mơdrô mơ̆ng đang hmua, anŏ či kiăng pơtruh nao rai sĭ mơdrô, pok pơhư prong anih anom sĭ mơdrô, hyu blơi gơnam tam phun mơ̆ng hơdôm tơring čar tơdruă.

Ƀing khua mua pơ ala kơ hơdôm anom bruă sĭ mơdrô, anom ngă ƀong hrŏm ăt lăi pơthâo gơnam sĭ mơdrô gơñu hơmâo, kah pơpha anŏ či kiăng sĭ hăng blơi brơi pơtruh nao rai gơnam sĭ mơdrô. Gah rơngiao kơ mông jơnum, ƀing ngă bruă sĭ mơdrô mơ̆ng 3 boh tơring čar hơmâo ba pơdă, lăi pơthâo gơnam sĭ mơdrô pơkra ming phun; pơčrong sai hơdră pơpha hyu sĭ, blơi laih anun ĕp anih či kiăng blơi hăng bơnah či kiăng, ngă hră pơkôl sĭ blơi, truh pơ jơnum bơkơtuai kĭ pơkôl ngă hrŏm sĭ mơdrô. Ƀrô tal anai, hơmâo 29 pok hră kĭ pơkôl hơdor pioh ngă hrŏm sĭ mơdrô, blơi gơnam tam mơ̆ng djop sang bruă sĭ mơdrô pơkra ming, gơnam tam mơ̆ng anom ngă ƀong hrŏm hăng sang bruă pô hyu pơpha sĭ mơdrô ƀơi hơdôm tơring čar ngă hrŏm kĭ pơkôl laih.