Tui lăi pơthâo, bruă tuh tia pơkra ming, bruă sĭ mơdrô-bơwih bơwang amăng tơring čar Dak Lak amăng 2 blan akŏ thun tŏ đĭ tui. Rơnoh sĭ mơdrô pơ tač rơngiao him lăng 218 klăk đôlar Mi, đĭ 5%. Bruă tuai čuă ngui hơkrŭ kơtang hăng giăm 1,2 klăk wŏt tuai čuă ngui, đĭ giăm dua wŏt pơhmu tui tơđar thun hlâo. Pơhrui ngăn drăp kơnuk kơna amăng 2 blan giăm 3.800 klai prăk.

Bruă bơwih ƀong sĭ mơdrô ăt hơmâo lu tơlơi gal mơn hăng 236 boh anom bơwih ƀong sĭ mơdrô phrâo pok, abih tih prăk tuh pơ alin bơwih ƀong giăm 2.860 klai prăk. Tui khua mua tơring čar Dak Lak, lu bruă mă glăk tŏ tui pơđĭ kyar dua mrô mơng akŏ thun mơtăm, ngă pơtrut kiăng pơjing hơnong pơkă pơđĭ kyar hrŏm.