Tui hăng Gơnong bruă jơlan glông pơdŭ pơgiăng tơring čar Dak Nông, tal hơjan ia dăo rơnuč blan 7, akŏ blan 8 phrâo rơgao ngă răm rai kơtang 2 ring bruă jơlan nao rai prong mơ̆ng tơring čar, hơmâo 300m jơlan Hồ Chí Minh găn nao pơ phường Nghĩa Thành, plơi prong Gia Nghĩa; 850m jơlan tơring čar mrô 1 să Quảng Tâm, tơring glông Tuy Đức. Wơ̆t 2 glông jơlan mơ̆ng 2 ring bruă lêng kơ tơhroh kơtang. Jơnum min mơnuih ƀôn sang tơring čar Dak Nông hơmâo pơtrun hră ječ ameč kơ tơlơi truh lŏn adai ngă ƀơi dua glông jơlan, git gai hơdôm anom apăn bruă pơkra brơi tañ, kiăng jơlan thâo nao rai.

Khă hnun, bruă pơkra jơlan ră anai glăk tơnap biă, biă ñu aka ƀu thâo mă prăk mơ̆ng pơpă či pơkra. Tui hăng jŭ yap lăng hlâo, kiăng năng ai 300 klai prăk čih pơkra 2 glông jơlan anai. Amăng anun, tơring čar glăk kiăng kơnuk kơna djru ba 150 klai prăk mơ̆ng mrô prăk pioh pơgang tơlơi truh lŏn adai ngă či pơkra jơlan tơring čar mrô 1. Hăng jơlan Hồ Chí Minh, tơring čar glăk rơkâo Ding jum jơlan glông pơdŭ pơgiăng pơsit prăk či pơkra ăt kah hăng hơdră pơkra jơlan.