Ơi Trần Đình Hiệp, Khua Gơnong bruă kông ngăn glai klô hăng rơhuông adai lŏn mơnai tơring čar Dak Nông brơi thâo,  tơlơi lŏn tơhlom ƀơi ia krông Krông Nô hmâo lu thun hăng anai laih, biă ñu tơdơi kơ hmâo hơdôm rơwang bruă drai ia pơkĕ apui lơtrik kah hăng drai ia pơkĕ apui lơtrik Tua Srah hăng drai pơkĕ apui lơtrik Čư̆ Pông Krông. Ơi Hiệp ăt pơsit mơn tơlơi lŏn tơhlom ƀơi ia Krông Nô hmâo lĕ yua kơ bruă hyu mă čuah mơ̆ng hơdôm bôh anom bơwih ƀong wot tơring čar Dak Lak hăng Dak Nông pơsit brơi mă. Ia Krông Nô jai hrơi jai tơhlom hăng jai prong tui. Tui hăng ơi Hiệp, yua kơ ƀu pơsit bruă gơgrong rơđah mơ̆ng hơdôm anom bơwih ƀong bơdjơ̆ nao anun bruă pơsir bruă gơgrong hăng bruă pơ ala glăi kơ mơnuih ƀôn sang glăk bưp lu tơlơi tơnap.

 “Yua anun yơh bôh than ba truh yua kơ bruă mă čuah hăng pơkra drai ia pơkĕ apui lơtrik, anun yơh drai ia pơkĕ apui hăng pô tuh pơplai jing Buôn Tua Srah ƀu tŭ ư hrŏm ôh rơnoh pơ ala glăi mơ̆ rơkâo tơring čar khom tek rơwek nao pioh hơdôm anom bruă mă čuah bơdjơ̆ nao dua bơnah gum hrŏm pơ ala glăi kơ mơnuih ƀôn sang. Ră anai lĕ bruă lŏn tơhlom tui anun samơ̆ pơsit rơnoh bơdjơ̆ nao, hơdôm črăn mơ̆ng pô tuh pơplai hơpă tơnap tap hloh, drai ia hơdôm črăn, mă čuah hơdôm črăn hă akă dưi pơsit nua ôh”.

Tui hăng ơi Trần Văn Khánh, Khua Sang bruă pơkra drai ia pơkĕ apui lơtrik Buôn Kuốp, tơlơi lŏn tơhlom ƀơi ia Krông Nô hmâo pơsit lĕ, yua kơ lu bôh than ba truh kah hăng anih anom, lŏn trŏn, pơplih ayuh hyiăng, mă čuah hăng pơđoh ia pơkĕ apui. Amăng anun, bôh thâo pơđoh ia pơkĕ apui hmâo bruă gơgrong mơ̆ng Sang bruă pơkra drai ia pơkĕ apui Buôn Kuốp. Khă hnun hai, mơ̆ng thun 2018 truh ră anai, rơnoh lŏn tơhlom ƀơi ia Krông Nô tañ đơi hăng bơdjơ̆ nao prong mơ̆ng bruă mă čuah. Bơnah sang bruă drai ia pơkĕ apui amra pơ ala glăi anô̆ răm rai kơ mơnuih ƀôn sang, samơ̆ hăng tơlơi rơkâo gong gai plơi pla khom pơsit, kah pha rơđah bruă gơgrong mơ̆ng abih bang hơdôm bôh anom bơwih ƀong bơdjơ̆ nao.

Ăt tui hăng ơi Khánh, ƀơi sa dua črăn lŏn tơhlom, sang bruă drai ia pơkĕ apui Buôn Kuốp gơgrong ba pơ ala glăi. Hlâo adih, hơdôm lŏn ngă đang hmua mơ̆ng mơnuih ƀôn sang hmâo lŏn tơhlom, gong gai tơring čar pơsit jơlan gah, sang bruă hmâo gru than tơlơi phiăn kiăng mă yua prăk pơ ala glăi. Samơ̆ hơdôm thun jê̆ hăng anai, gong gai rơkâo sang bruă khom pơkôl mă hăng mơnuih ƀôn sang amăng bruă pơ ala glăi:

 “Ră anai phun hmâo tơlơi, hơdră ngă kah hăng hlâo adih lĕ gong gai tơring čar lăi lĕ, yua kơ hơdôm tơlơi pơkă tơlơi phiăn, gong gai ƀu pơsit jơlan gah pơ ala glăi dong mơ̆ rơkâo Sang bruă drai ia pơkĕ apui lơtrik Buôn Kuốp nao pơkôl hăng mơnuih ƀôn sang kơ prăk pơ ala glăi, djru kual lŏn tơhlom.  Jơlan gah pơ ala glăi, djru khom dưi hmâo ƀirô wai lăng kơnuk kơna pơsit lĕ sang bruă mơ̆ng mă tơbiă prăk. Hră pơ-ar mơ-ĭt tơring čar laih jơnum lĕ jơnum yơh, samơ̆ akă dưi pơtlaih ôh”.

Ơi Trần Đăng Ánh, Kơ-iăng Khua Jơnum min mơnuih ƀôn sang tơring glông Krông Nô, tơring čar Dak Nông brơi thâo, bruă pơ ala glăi lŏn tơhlom lŏn ngă đang hmua ƀơi ia Krông Nô hơdôm hrơi rơgao yua 2 bơnah lĕ hơdôm sang bruă mă čuah hăng sang bruă pơkĕ apui lơtrik dar hăng jua ia pơphun. Hơdôm črăn lŏn tơhlom gah kual mă čuah dưi pơsit brơi lĕ hơdôm sang bruă mă čuah rŏng pơkôl mă prăk pơ ala glăi kơ mơnuih ƀôn sang. Sa dua črăn lŏn tơhlom gah rơngiao kơ pơsit brơi mă hơdôm bôh anom bơwih ƀong mă čuah lĕ gah Sang bruă drai ia pơkĕ apui lơtrik Buôn Kuốp čơkă gơgrong ba pơ ala glăi.

Hlâo adih, Jơnum min mơnuih ƀôn sang tơring glông pơsit jơlan gah pơ ala glăi lŏn tơhlom. Samơ̆ lơm pel ĕp glăi Tơlơi phiăn lŏn drŏn thun 2013 lĕ, ƀu hmâo pơkă gong gai tơring glông pơhrui mă glăi lŏn, pơ ala glăi djru ôh yua bruă mă mơ̆ng sang măi pơkĕ apui lơtrik dar hăng jua ia ba truh. Yua anun, tơring glông hmâo ba tơbiă laih jơlan gah gum hrŏm, djru sang bruă pơkĕ apui lơtrik ngă tui djop tum bruă pơkă pơ ala glăi kah hăng hlâo adih, kơnong kơ pha ra ƀơi yak rơnuč lĕ sang bruă pơsit jơlan gah pơ ala glăi. Khă hnun hai, bơnah Sang bruă pơkĕ apui lơtrik Buôn Kuốp ăt akă tŭ ư mơn, ba truh tơlơi gun sui hrơi:

 “Tơring glông ăt hmâo mă bruă laih hăng Sang bruă Buôn Kuốp lu wot. Tơring čar črâo ba anom kông ngăn glai klô pơsit sa jơlan gah hmâo wot lăi pơthâo glăi tơlơi pơsit, mơ-ĭt kơ sang bruă. Sang bruă kơnong kơ hluai tui anun pioh kĭ samơ̆ sang bruă glăi kiăng pơsit lĕ, gun ƀơi anai. Ră anai kơnong kơ pơtlaih sa yak anai đôč: pơsit jơlan gah ƀơi gưl tơring glông ƀudah pô tuh pơplai – anom bruă pơ ala glăi pơsit. Čang rơmang Sang bruă Buôn Kuốp gum hrŏm kơjăp hloh dong, biă ñu rơkâo hơdră gưl dlông pioh hmâo jơlan gah pơsir”.

Phrâo anai, Khua Jơnum min mơnuih ƀôn sang tơring čar Dak Nông hmâo črâo ba Gơnong bruă kông ngăn glai klô hăng rơhuông adai lŏn mơnai pơdŏng khul mơnuih hyu hơduah ĕp, gum hrŏm hăng tơring čar Dak Lak pơsit rơđah bôh than ba truh lŏn tơhlom ia Krông Nô hăng bruă gơgrong hơdôm bơnah bơdjơ̆ nao kiăng tañ ngă tui bruă pơ ala glăi anô̆ răm rai kơ mơnuih ƀôn sang. Hrŏm hăng anun, hơdôm bôh ƀirô bơdjơ̆ nao mơ̆ng tơring čar khom ngă tui tơlơi pơkă ƀơi Tơlơi pơtrun pơkă 23 mơ̆ng Gong gai dêh čar pơkă kơ wai lăng čuah, ga hlung ia krông hăng pơgang hlung ia, hang ia, tơdrŏn čuah ia krông./.