Dong mơng akô̆ bơyan pĕ kơ phê 2021-2022 mơtăm, ƀơi tơring čar Daknông hmâo tơlơi klĕ dop kơ phê. Ră anai hơdôm plơi pla hmâo kơtưn bruă pel ĕp, wai lăng, pơkĕ hrom hăng lăi pơhing kơ mơnuih ƀôn sang pơđĭ tui tơlơi kơđiăng kiăng pơgang kông ngăn amăng bơyan pĕ kơ phê.

Kiăng pơhlôm hơđong amăng bơyan pĕ kơ phê, hơdôm bôh plơi pla amăng Daknông hmâo pơtrut kơtang bruă lăi pơhing, lăi pơtă hơdôm bruă mă, bruă ngă mơng ƀing klĕ dop. Khul kông ang ăt kơtưn mơn bruă hyu tir, wai lăng ƀơi hơdôm bôh plơi pla phun, pel ĕp dô̆ glăi hăng mrô mơnuih hyu mă bruă hơdư̆ či hor, mơnuih hyu mă bruă arăng apah tui bơyan... Kông ang Daknông pơtă mơng ƀôn sang lŏm apah mơnuih mă bruă khom pel ĕp hră pơ-ar djă ba hăng ngă tui bruă ngă hră pơ-ar dô̆ glăi, rơkut tui tơlơi pơkă./.