Tom brơi (18/11), amăng tal hơdor glăi 40 thun hrơi pơpŭ nai pơtô Việt Nam,  pơphun mông pơpŭ ƀing nai pơtô, khul grup nai pơtô ba gru amăng tơring čar Dak Nông, Khua mua Jơnum min mơnuih ƀon sang tơring čar Dak Nông pơsit tong: tơring čar amra tŏ tui đing nao tuh pơ alin lu ƀiă dong amăng bruă pơtô hrăm, wŏt gơnam tam măi mok kah hăng pơtrut pơsur pran mă bruă, djru brơi ƀing nai pơtô găn rơgao tơnap tap kiăng pơgiong bruă jao amăng pơtô hrăm brơi ƀing čơđai.

Ƀrô hrơi pơpŭ nai pơtô Việt Nam, Khua mua tơring čar Dak Nông hơmâo ƀơk gơnam brơi kơ ƀing nai pơtô pơdơi bruă thun tha, ƀing nai pơtô ba gru; jao hră pơpŭ bơni kơ 35 čô nai pơtô hăng khul grup ba gru, hơmâo lu tơlơi gum pơgôp brơi bruă pơtô hrăm ƀơi ƀon lan. Đĭ pơhiăp amăng mông jơnum pioh hơdor, ơi Hồ Văn Mười, Khua Jơnum min mơnuih ƀon sang tơring čar Dak Nông lăi pơtong, amăng hrơi blan tơlơi bơwih ƀong huă-mơnuih mơnam amăng tơring čar dŏ lu tơnap tap, samơ̆ gơnong bruă pơtô pơjuăt ƀu pơdơi pơplih phrâo amăng bruă wai lăng, pơplih phrâo jơlan hơdră pơtô hrăm, ngă tui ba glăi tŭ yua hơdôm hơnong pơkă, bruă jao, pơgôp ba glăi tơlơi dưi pơđĭ kyar amăng tơring čar.