Thun 2023, mrô sang anŏ ƀun rin ƀơi tơring čar Dak Nông pơhrŏ trun 2,8%, amăng anun, pơhrŏ ƀun rin hăng sang anŏ mơnuih djuai ania ƀiă lĕ 8,1%. Hăng boh than anai, Dak Nông tŏ tui ba jơlan hlâo kual Dap kơdư kơ bruă pơhrŏ trun ƀun rin lơm tơring čar dong tal 2 lĕ Dak Lak hơmâo mrô pơhrŏ trun ƀun rin lĕ 1,5%. Ơi Hồ Sỹ Hải, Khua anom bruă djru mơnuih mơnam, gơnong bruă mă-tơhan rơka-mơnuih mơnam tơring čar Dak Nông brơi thâo, mơng hrơi akŏ pơjing tơring čar (thun 2004) truh ră anai, tơring čar lêng kơ pơsit pơhrŏ trun ƀin rin lĕ bruă akŏ phun.

Hăng pran gir run hăng hơdôm hơdră bruă mơng tơring čar ba glăi boh tŭ yua lơm jŭ yap glăi 20 thun laih rơgao, Dak Nông lĕ sa amăng 10 boh tơring čar hơmâo mrô pơhrŏ trun ƀun rin tañ hloh đơ đam dêh čar hăng dong tal sa amăng kual Dap kơdư. Mrô sang anŏ ƀun rin hơmâo hrŏ trun mơng 33,7% amăng rơnuč thun 2004 truh ră anai dŏ kơnong 5,2%. Tơring čar ba tơbiă hơnong pơkă thun 2024 hrŏ trun dŏ 3% mrô sang anŏ rin hăng gir run truh abih thun 2025 ƀu hơmâo hlơi dong tah ƀun rin tui hơnong pơkă phrâo. Kiăng kơ dưi ngă hơnong pơkă anai, hrŏm hăng bruă ngă tui hơdră djru mơng Kơnuk kơna, Dak Nông glăk đing nao ngă tui lu hơdră bruă sit nik hăng ba glăi tŭ yua.