VOV4.Jarai - Čơtlăm lơ 5/10, Khul pơlir hơbit Hlăk ai Việt Nam tơring čar Daklak pơphun pok phun rơwang pơplông tal blung a pơplông pơphun bruă bơwih ƀong sĭ mơdrô tơring Daklak thun 2022. Tơdơi rơbêh 2 blan pơphun, bruă pơplông pơphun bruă mă bơwih ƀong sĭ mơdrô tơring čar Daklak thun anai hmâo čơkă mă 100 akô̆ bruă, rơwang bruă pơplông mơng mơnuih gum hrom pơplông, grŭp mơnuih amăng hăng gah rơngiao kơ tơring čar.

Mơnuih nao pơplông lăi pơdah rơwang bruă pok phun bruă mă hăng gơnam Handmade

Hơdôm rơwang bruă gah lu gơnong bruă, bruă mă kah hăng: Bơwih ƀong sĭ mơdrô gah đang hmua, rông hlô, tơjŭ pla, sĭ mơdrô gơnam tam. Rơgao kơ pơplông rơwang sa, grŭp pơphun bruă pơplông hmâo ruah laih 80 akô̆ bruă gum hrom lăi pơdah ƀơi anăp amăng rơwang pơplông tal sa. Ayong Y Lê Pas Tơr, Kơ-iăng Khua Khul hlăk ai tơring čar, Khua Khul pơlir hơbit hlăk ia Việt Nam tơring čar Daklak brơi thâo, tơdơi kơ 3 wot pơphun, bruă pơplông thun anai brơi ƀuh tơlơi tuh pơplai mơng ƀing nao pơplông hăng hơdôm rơwang bruă dưi ngă tui hơdră pơplih phrâo gơnam tam rơđah rơđông./.

VOV.TN čih

Siu H’ Prăk pơblang