VOV4.Jarai - Ƀing gơgrong pơdŏng bruă čan hlâo rơbêh kơ 2 rơbâo klai prăk tuh pơplai ƀơi tơring čar Daklak samơ̆ ha amăng plĕ rơwang bruă kaih hĭ pok pơhai ngă prăk čan rơgao kơ hrơi pơkă pioh tla giăm truh 1 rơbâo klai prăk. Tư̆ glăi prăk, Daklak amra hmâo tơlơi pơkă đĭ tui prăk pơsir ƀơi hơdôm rơwang bruă hmâo rơnoh bruă klă. Khă hnun hai, anai lĕ tơlơi pơnap biă yua kơ ƀu ƀiă anom bơwih ƀong glăk bưp tơlơi truh amăng bơwih ƀong sĭ mơdrô, prăk čan hlâo jing hnưh dŏng tơnap tư̆. Mơta pơkon Jơnum min mơnuih ƀôn sang tơring čar ăt bơngot mơn tơdah pơhrui glăi prăk, tŭ ư rơwang bruă kaih rơnoh lĕ, amra hmâo Kơnuk kơna ƀu brơi prăk tuh pơplai dong tah.

Rơwang bruă tuh pơplai pơkra jơlan Hồ Chí Minh črăn jơlan wer gah Ngŏ plơi prong Buôn Ma Thuột, tơring čar Daklak pok pơhai rơwang 2020-2023 hmâo abih bang prăk tuh pơplai 1.509 klai prăk, truh ră anai hmâo pơpha brơi laih 1.044 klai prăk. Khă hnun hai, rơnoh pơkra rơwang bruă kaih hĭ hăng mrô bruă hmâo dưi ngă mă 8%, dưm dưm hăng 80 klai prăk. Lom anun, mrô prăk čan hlâo mơng hơdôm mơnuih gơgrong bruă man pơkra đĭ truh rơbêh kơ 220 klai prăk. Ơi Phan Xuân Bách, Kơ-iăng Khua gơgrong Grŭp wai lăng rơwang bruă tuh pơplai pơkra jơlan hăng bruă đang hmua pơđĭ kyar ƀôn lan tơring čar Daklak, pô tuh pơplai rơwang bruă, brơi thâo, sa dua čô mơnuih tuh pơplai čan mă yua hlâo prăk samơ̆ kah hăng abih bang ƀu hmâo pơkra jơlan ôh, prăk mă yua jing “prăk tơnap tư̆”.

Rơđah biă ñu lĕ Sang bruă bơwih ƀong mơnuih ƀôn sang Phương Đông (mrô 47 jơlan Thái Phiên, plơi prong Buôn Ma Thuột) – pô gơgrong bruă mrô 3 gah rơwang bruă mă yua hlâo rơbêh kơ 44 klai prăk hăng dưi hmâo sa bôh sang prăk pơgang ba ƀu hmâo tơhnal gơgrong prăk mă yua hlâo. Khă hnun hai, sang bruă anai hmâo laih tơlơi truh hăng khom pơplih mơnuih pơ ala kơ tơlơi phiăn. Pô tuh pơplai hmâo pơtrut lu wot laih, samơ̆ giăm hmâo sa thun, anom bơwih ƀong anai ƀu ngă tui hơdôm črăn bruă khom ngă tui hră pơkôl. Pô tuh pơplai khom 2 wot ngă hră pơ-ar pơhrui glăi rơbêh kơ 44 klăi prăk anai mơng sang prăk gơgrong pơgang ba samơ̆ akă pơsir giong ôh:

“Amăng hră pơkôl pơkă hơdôm tơhnal tla prăk mă yua tal 1, tal 2, tal 3, samơ̆ amăng 3 blan ƀu hmâo tla glăi sa prăk hơpă ôh, anun lĕ ƀu hmâo mrô pioh tla glăi lĕ tui Tơlơi pơtrun pơsit 99 thun 2021 lĕ rơkâo khom pơhrui glăi. Tơlơi anai ƀu djơ̆ mơ-ĭt kơ sang bruă ôh yua kơ sang prăk pơgang ba, ƀu thâo hiưm hơpă ôh sang prăk pơhlôm brơi ƀu hmâo tơlơi gơgrong hơpă ôh lĕ, ră anai khom tư̆ glăi. Ră anai dưi mă glăi hă ƀu mă glăi lĕ khom tơña sang prăk”.

Rơnoh rơwang bruă Hồ Chí Minh črăn jơlan wer gah Ngŏ plơi prong Buôn Ma Thuột kaih biă, mrô bruă kơnong kơ dưi ngă năng ai ñu 80 klai prăk, lom anun mrô prăk mă yua hlâo mơng ƀing gơgrong bruă pơkra jơlan đĭ truh rơbêh kơ 220 klai prăk

Prăk mă yua hlâo rơgao hrơi pơkă “hnưh tơnap tư̆” ăt lĕ tơlơi hrom ƀơi hơdôm rơwang bruă ƀơi tơring čar Daklak. Tui hăng tơlơi lăi pơthâo glăi mơng Sang prăk Kơnuk kơna tơring čar Daklak, yap truh ră anai, amăng abih bang mrô rơbêh kơ 2.115 klai prăk mă yua hlâo lĕ hmâo giăm truh kơ 1.000 klai prăk rơgao hrơi pơkă. Sang prăk Kơnuk kơna hmâo rơkâo laih hơdôm gưl mơng tơring čar hmâo jơlan gah pơhrui glăi mrô prăk mă yua hlâo anai. Ơi Phạm Ngọc Nghị, Khua Jơnum min mơnuih ƀôn sang tơring čar Daklak brơi thâo, tơring čar ăt hmâo ba tơbiă mơn hră pơ-ar pơhrui glăi prăk phrâo lăi anun, samơ̆ ăt črâo ba mơn hơdôm bôh ƀirô mơng tơring čar kơđiăng kiăng bĕ tơlơi pơhrui glăi prăk giong mă glăi dong:

“Sang dưm prăk lăi pơthâo glăi hăng rơkâo pơhrui glăi abih mơ̆, pơhrui glăi truh črăn ƀu hmâo prăk tla kơ mơnuih ƀôn sang, bơhmutu ñu kah hăng pơ ala glăi. Kah hăng rơwang bruă Krông Pač thượng, ră anai dô̆ năng ai ñu 400 klai prăk pioh tla prăk pơ ala glăi kơ mơnuih ƀôn sang mơ̆ pơhrui glăi prăk anai, kơnuk kơna mă abih prăk glăi lĕ 400 klai prăk anai tơring čar mă mơng hơpă pioh tla kơ mơnuih ƀôn sang. Ră anai pơhrui glăi hăng hơdră hơget, dŏng amăng mrô hơpă, ngă hiưm hơpă”.

Tơlơi pơtrun pơkă 99 thun 2021 mơng Kơnuk kơna pơkă kơ wai lăng, pơsir prăk, pơkă prăk yua kơ rơwang bruă pơkra jơlan hmâo pơkă rơđah, tŏng teng gah prăk mă yua hlâo hăng pơhrui glăi prăk. Amăng anun, tơlơi pơkă: “Prăk mă yua hlâo rơgao hrơi pơkă tơdơi kơ 3 blan yap mơng hrơi khom pơhrui glăi prăk mă yua hlâo tui tơlơi pơkă amăng hră pơkôl mơ̆ pô gơgrong pơkra jơlan akă ngă tui ƀudah lom thâo pô gơgrong bruă mă yua soh bôh than, pô tuh pơplai hmâo bruă gơgrong git gai, gum hrom hăng ƀirô pel ĕp, pơsir prăk kiăng mă glăi prăk hmâo mă yua hlâo kơ sang prăk kơnuk kơna”. Tui anun, ƀơi Daklak ăt hmâo mơn tơlơi prăk mă yua hlâo rơgao hrơi pơkă amăng sa thun. Tơlơi anai hmâo ba tơbiă, tơlơi truh, hơdôm pluh, hơdôm rơtuh klai prăk kơnuk kơna hmâo ƀing mă yua pơkra jơlan, hơdôm bôh anom bơwih ƀong mă yua kơ bruă hơget, mă tŭ hă ƀu mă tŭ. Anai jing tơlơi hơdôm ƀirô gơgrong bruă tơring čar Daklak khom kơsem min kiăng ba tơbiă hơdôm bruă wai lăng prăk ba glăi bôh tŭ yua hloh./.

PV-CQTT Tây Nguyên: Čih – Siu H’ Prăk: Pơblang