VOV4.Jarai - Phrâo anai, tơring glông Krông Pač, tơring čar Daklak pơphun ngă lơphet lăi pơthâo mrô sĭ sầu riêng blung a mơng dêh čar ta kơ dêh čar Khač. Kiăng dưi sĭ djơ̆ mrô pơkă, sầu riêng khom dưi pơsit mrô kual pla. Tui anun mơn, lom ngă hră pơ-ar, mơnuih ƀôn sang ƀơi tơring glông Krông Pač glăk ƀuh sa dua đang pla hmâo anom bơwih ƀong ngă hră pơ-ar pơsit mrô kual pla mơng hơbin ƀu thâo ôh. Tơlơi ƀu rơđah anai ngă mơnuih ƀôn sang bơngot biă, tơdah ƀu pơsir khut khăt hăng hmao tlôn, amra bơbeč truh bruă sĭ gơnam hmâo nua yôm anai.

Hơdôm hrơi jê̆ hăng anai, mơnuih ƀôn sang plơi Tân Bắc, să Ea Kênh, tơring glông Pač, tơring čar Daklak črông lô kơ bruă pơsit mrô kual pla kơ sầu riêng. Dŏng amăng krah đang sầu riêng prong giăm truh 2 ektar pla hmâo 18 thun hăng anai, yă Lê Thị Hương hrom hăng hơdôm mơnuih amăng plơi ƀu mơ-ak lom lăi kơ bruă đơ đam đang pla sầu riêng ƀơi anai hmâo Sang bruă bơwih ƀong mơnuih ƀôn sang sĭ mơdrô gơnam mă mơng đang hmua Thiện Tâm ngă hră pơ-ar pơsit mrô kual pla, anom bơwih ƀong ƀu hmâo lăi pơthâo ôh hăng pô pla hăng ăt ƀu pơhrui blơi mơn sầu riêng ƀơi anai:

“Mrô kual pla gơñu lăi hmâo mơnuih ƀôn ƀơi plơi Tân Bắc anai laih, samơ̆ bôh nik ñu gơñu ƀu hmâo rai pơ̆ anai pioh tơña lăng đang anai sĭ hiưm hơpă ôh pioh gơñu blơi. Abih bang gơñu ƀu blơi ôh, ƀing gơmơi khom sĭ kơ mơnuih hyu blơi pơkon. Ră anai mơnuih ƀôn sang ƀing gơmơi rơkâo tơring čar, tơring glông, să nă rơđah tơlơi anai”.

Mơnuih pla sầu riêng ƀơi plơi Tân Bắc ƀu mơ-ak lom mrô kual pla dưi pơsit kơ anom bơwih ƀong sĭ mơdrô mơ̆ mơnuih ƀôn sang ƀu thâo

Ơi Hoàng Trọng Cường, Khua plơi Tân Bắc, să Ea Kênh brơi thâo: 2 thun hlâo adih, mơnuih pơ ala mơng Sang bruă bơwih ƀong mơnuih ƀôn sang sĭ mơdrô gơnam mă mơng đang hmua Thiện Tâm hmâo nao pơ̆ plơi rơkâo neh wa yap kual lŏn pla, samơ̆ ƀu hmâo lăi rơđah ôh lăi pơthâo pioh ngă hơget. Jê̆ hăng anai, lom sầu riêng amăng kual dưi sĭ kơ dêh čar tač rơngiao, sa dua bôh anom bơwih ƀong sĭ mơdrô nao lăi pơthâo hăng grŭp mă bruă hrom mơng plơi rơkâo pơlir hơbit ngă hră pơ-ar mrô kual pla, pơhrui blơi, blơi abih gơnam anun kah mơng thâo mrô kual pla mơng lu đang sầu riêng amăng plơi hmâo lăi pơthâo laih kơ Sang bruă Thiện Tâm. Ơi Hoàng Trọng Cường lăi:

“Hmâo lu anom bơwih ƀong sĭ mơdrô rai pơ̆ anai kiăng pơlir hơbit hăng hơdôm bôh sang anô̆ mơnuih ƀôn sang amăng plơi hmâo 2 grŭp mă bruă arăng lăi pơthâo kiăng ngă mrô kual pla, nao pơ̆ tơring glông lĕ tơring glông lăi glăi mrô kual pla anai hmâo pơsit brơi laih. Mơnuih ƀôn sang tơña kơđai glăi lĕ, yua hơget pơsit mơ̆ ƀu lăi pơthâo. čang rơmang mơng neh wa lĕ sang bruă rai mă bruă ngă rơđah kơ mrô kual pla anai yua tơlơi anai nao hrom hăng bôh tŭ yua hăng gơnam tam mơng mơnuih ƀôn sang”.

Tơring čar Daklak hmâo năng ai ñu 15.000 ektar đang sầu riêng, amăng anun hmâo 23 mrô kual pla hmâo pơsit laih kơ 1.500 ektar đang pla

Yă Ngô Thị Minh Trinh, Kơ-iăng Khua Jơnum min mơnuih ƀôn sang tơring glông Krông Pač, tơring čar Daklak brơi thâo, tơdơi kơ hmâo tơlơi pơhing neh wa plơi Tân Bắc lăi nao kơ mrô kual pla, tơring glông hmâo črâo ba laih hơdôm bôh ƀirô apăn bruă gum hrom hăng anom bơwih ƀong pơphun bơkơtuai. Gah tơlơi hmâo hă ƀu hmâo tơlơi leč pơdar amăng pơsit mrô kual pla, tơring glông Krông Pač glăk črâo ba hơdôm bôh ƀirô apăn bruă pơphun pel ĕp, lăng glăi abih bang anih anom kiăng ngă rơđah hăng hmâo jơlan gah pơsir:

“Tơring glông amra hmâo kơčăo bruă pel ĕp abih bang, hmâo pơsit brơi hlơi, ba tơbiă anô̆ hơget, dưi hmâo mrô hơpă, ƀing gơmơi khom pơsir kiăng ngă rơđah tơlơi anai mơtăm. Yua kơ dô̆ pơgang tơlơi đăo gơnang, anăn gơnam Krông Pač dong. Gah mrô kual pla, tơdah wai lăng ƀu kơjăp, arăng mă gơnam hơpă anun ƀơi sa anih hơpă anun pơ̆ anih pơkon mơ̆ lăi anai lĕ gơnam mơng Krông Pač, klah piah hmâo tơlơi ruă măt ƀudah hmâo tơlơi hơget thơ. Sit ñu pơ̆ anăp anai amra hmâo jơlan gah pơsit rơđah hăng hơdră wai lăng kơjăp mrô kual pla anai”.

Tơlơi ƀu rơđah amăng pơsit mrô kual pla sầu riêng truh kơ ră anai phrâo thâo mă ƀơi plơi Tân Bắc, să Ea Kênh, tơring glông Krông Pač đôč hăng rơnoh ñu hơdôm pluh ektar. Ră anai ăt akă thâo mơn amra dô̆ hơdôm hơpă kual lŏn pla hmâo tơlơi anai. Samơ̆ rơgao kơ anai brơi ƀuh hmâo lu tơlơi akă kơjăp amăng bruă mă hăng tơlơi akă gal, kơƀah bruă gơgrong mơng hơdôm bôh ƀirô bơdjơ̆ nao lom pok pơhai pơsit mrô kual pla. Ơi Nguyễn Hoài Dương, Khua Gơnong bruă đang hmua hăng pơđĭ kyar ƀôn lan tơring čar Daklak lăi lĕ, khă phrâo ƀơi rơnoh ƀiă samơ̆ tơlơi anai amra ngă sat prong biă hăng khom pơsir tơpă kiăng pơhlôm pran đăo gơnang mơng gơnam tam:

“Tơlơi ngă mă ča kual pla, mă yua mrô kual pla ƀu djơ̆, yua mrô kual pla mơng kual anai samơ̆ glăi phang sầu riêng mơng anih pơkon ba mut amăng bruă sĭ kơ dêh čar tač rơngiao anun lĕ tơlơi leč pơdar, ngă soh tơlơi phiăn. Hơdôm tơlơi anun khom tañ thâo hăng pơsir tơpă. Kâo ăt čang rơmang mơn hơdôm bôh ƀirô apăn bruă, biă ñu mơnuih ƀôn sang lăng tui kơjăp bruă anai, tơdah thâo ƀơi hơpă hmâo tơlơi anai thơ khom tañ lăi glăi kơ ƀirô apăn bruă kiăng pel ĕp hăng pơsir tơpă pioh ngă hiưm hơpă dưi djă pioh tơlơi đăo gơnang kơ bôh sầu riêng Việt Nam”.

Truh ră anai, tơring čar Daklak hmâo năng ai ñu 15.000 ektar đang sầu riêng, amăng anun hmâo 23 mrô kual pla dưi pơsit hră pơ-ar kơ 1.500 ektar. Bruă mơnuih ngă đang hmua ƀom anom bơwih ƀong leč pơdar mrô kual pla ƀơi plơi Tân Bắc, să Ea Kênh hăng rơnoh 100 ektar đang pla, khă anet samơ̆ brơi ƀuh hmâo hơdôm tơlơi akă gal, ƀu kơjăp lom pơjing hăng pơsit hră pơ-ar. Tơlơi anai kiăng hmâo ƀirô wai lăng, khom pel ĕp glăi glông bruă, hmâo hơdôm tơlơi pơtô ba, rơđah rơđông, tum djop./.

Công Bắc-VOV.TN/Siu H’ Prăk pơblang