VOV4.Jarai - Tơring čar Daklak hmâo rơbêh kơ 1.000 bôh sang hră anih hrăm hăng lu sang hră amăng mrô anun hmâo tơlơi ngă gun ƀơi jơlan nao rai amăng kual bah amăng war sang hră lom ƀing čơđai sang hră nao sang hră hăng lom glăi mơng sang hră, amra ƀu pơhlôm klă. Thun hrăm 2022-2023, gơnang kơ pơgăn tơlơi sĭ mơdrô ča cot ƀơi bah amăng war sang hră, lăi pơhing pơđĭ tui tơlơi pơmin mơng amĭ ama čơđai hăng čơđai sang hră, pơplih anih anom gơnam tam, tơlơi anai hmâo hơkrŭ lu mơn; lu sang hră plai ƀiă laih ngă gun jơlan nao rai.

Sang hră gưl sa Nguyễn Bỉnh Khiêm ƀơi kual krah plơi prong Buôn Ma Thuột, ƀơi djeo čơlah 4 jơlan Nguyễn Đình Chiểu – Lê Thánh Tông. Kual anai hlâo adih hmâo lu anih anom sĭ gơnam ƀong mơguah, kơ phê ƀudah hơdôm bôh rơdêh pơtrut hyu sĭ gơnam anun jơlan nao rai luk puk, ngă gun. Khă hnun hai, tơlơi anai thun anai ƀu dô̆ hmâo tơlơi gun dong tah. Yă Nguyễn Thị Phương, sang anăp nao rai hăng sang hră brơi thâo:

“Hơdôm thun hlâo adih amĭ ama čơđai sang hră đĭ rơdêh thut, ô tô pơgiăng ană nao sang hră ƀudah čơkă ană glăi mơng sang hră juăt dŏng ƀơi hơpă lĕ brơi ană trun ƀơi anun; laih anuh tuai mơng anih anom sĭ gơnam ƀong, mơñum kơ phê tui anun yơh suă mă jơlan nao rai, đa lĕ wot abih plăng jơlan hăng amăng jơlan mơtăm. Mông hmâo lu mơnuih rô nao rai luk puk, ngă gun kơtang hloh lĕ 6 – 7 mông mơguah ƀudah 2 mông 30 mơnit -5 mông čơtlăm, hơdôm hrơi amăng rơwang hrơi tơjuh. Khă hnun hai thun anai kâo ƀuh tơlơi anai huăi ƀuh dong tah”.

Kual bah amăng war Sang hră gưl sa Nguyễn Bỉnh Khiêm, plơi prong Buôn Ma Thuột ră anai ƀu dô̆ tơlơi luk puk dong tah

Tui hăng nai Lê Mai Thanh – Sang hră gưl sa Nguyễn Bỉnh Khiêm, hlâo kơ pok phun thun hrăm 2022-2023, sang hră hmâo jơnum abih bang nai pơtô čơđai, mơnuih apăn bruă kiăng pok pơhai hơdôm bruă mă mơng thun hrăm, amăng anun hmâo ngă hơđong glăi jơlan nao rai ƀơi anăp Sang hră. Grŭp apăn bruă Sang hră hmâo pơjing laih grŭp mơnuih ba jơlan hlâo gum hrom hăng khul pơgang jơlan nao rai pơpha jơlan nao rai, pơtô brơi amĭ ama čơđai jưh rơdêh djơ̆ anih pơkă.

“Sang hră hmâo pơdŏng laih 3 grŭp, rim grŭp mơng 2 – 4 čô mơnuih pơpha jơlan nao rai, pơtô brơi amĭ ama čơđai sang hră jưh rơdêh djơ̆ anih pơkă, bĕ ngă gun jơlan nao rai ƀơi bah amăng war sang hră. Hăng rơdêh ô tô lĕ kiăng jưh rơdêh amăng ƀiă, ƀu jưh sui, tơdah amĭ ama čơđai ƀu hmâo anih jưh rơdêh lĕ pơtô brơi gơñu nao pơ̆ anih lăp djơ̆; bơ̆ rơdêh thut ăt pơtô brơi mơn anih jưh rơdêh djơ̆ anih kơ rơdêh thut. Sang hră pơphun pơplih nao rai dô̆ gak pơpha tui mông tơbiă sang hră, bơhmutu ñu anih 1 tơbiă lom hơdôm mông, tơdơi kơ anun anih 2, anih 3, anih 4... tui anun. Lom tơbiă mơng sang hră lĕ pok abih bang hơdôm bah amăng war sang hră, mơng bah amăng war sang hră truh bah amăng gah tlôn...”

Amăng mông nao sang hră, tơbiă mơng sang hră, Kông ang plơi prong Buôn Ma Thuột leng kơ pơpha khul git gai bruă nao rai djru ngă plai ƀiă gun ƀơi jơlan glông pơ̆ hơdôm bah amăng war sang hră

Ƀơi plơi prong Buôn Ma Thuột, tơlơi ƀu hơđong ƀơi jơlan nao rai amăng kual bah amăng war sang hră kah hăng: Sang hră wai lăng pơtô čơđai muai Họa Mi, Sang hră gưl sa Nguyễn Đức Cảnh jơlan Phan Chu Trinh, Sang hră gưl 2 Tân Lợi jơlan Ngô Quyền, Sang hră gưl sa Võ Thị Sáu jơlan Bà Triệu, Sang hră gưl sa Lê Hồng Gấm jơlan Lý Thường Kiệt, ƀudah Sang hră gưl sa Nguyễn Bỉnh Khiêm jơlan Nguyễn Đình Chiểu... pơphun hmâo lu thun rơgao.

Trung tá Thái Văn Thìn – Kơ-iăng Khua Kông ang plơi prong Buôn Ma Thuột brơi thâo, tơdơi kơ pel ĕp hơdôm bôh sang hră hmâo tơlơi ngă gun jơlan nao rai, anom bruă ăt ƀuh mơn jơlan kăng pơpha khut khăt akă sit nik djơ̆ rơ-oa, anun ngă jơlan nao rai gun hĭ ƀơi bah amăng war sang hră jai ngă kơtang tui. Anom hmâo pơphô brơi laih Jơnum min mơnuih ƀôn sang plơi prong Buôn Ma Thuột ruh hĭ abih bang hơdôm anih kăng pha jơlan ƀơi anih čơlah 3, čơlah 4 giăm sang hră pơ ala nao hăng jơlan pik ia ping tuir pơlir nao rai, pơjing jơlan nao rai hruaih kiăng rơdêh nao rai gêh gal hloh. Hrom hrom hăng anun, pơphun pha hyu hră lăi pơhing kơ amĭ ama čơđai, čơđai sang hră pơđĭ tui tơlơi pơmin lom nao rai ƀơi jơlan; rơkâo hơdôm bôh sang anô̆ bơwih ƀong sĭ mơdrô anet raih daih ngă tui djơ̆ tơlơi pơkă kơ rơnuk rơnua hơđong, pơhlôm jơlan nao rai; biă ñu pơpha khul mơnuih git gai bruă nao rai ƀơi anih čơlah giăm sang hră, pơsir tơpă hơdôm mơnuih ngă soh... Trung tá Thái Văn Thìn brơi thâo:

“Kông ang plơi prong Buôn Ma Thuột hmâo pha hyu laih 3.400 pok hră lăi pơhing kơ 9.020 čô čơđai sang hră hăng nai pơtô čơđai kơ Phiăn jơlan nao rai. Pơpha rơbêh kơ 400 wot čô mơnuih apăn bruă tơhan, tơhan kông ang anun lĕ: Tơhan wai lăng ƀi jơlan nao rai, tơhan wai lăng tơlơi hơđong hăng tơhan wai lăng kual gum hrom lăi pơhing truh ƀing amĭ ama čơđai sang hră ba hăng čơkă ană glăi mơng sang hră jưh rơdêh djơ̆ anih pơkă bĕ ngă gun bruă rô nao rai hăng git gai bruă nao rai ƀơi hơdôm anih čơlah giăm bah amăng war sang hră”.

Đơ đam tơring čar Daklak ră anai hmâo giăm truh 500.000 čơđai sang hră tui hrăm ƀơi 1.071 bôh sang hră. Tui hăng ơi Đỗ Tường Hiệp – Kơ-iăng Khua Gơnong bruă pơtô pơhrăm tơring čar Daklak, tơring čar ƀu hơđong ƀơi jơlan nao rai pơ̆ hơdôm bah amăng war sang hră ƀu djơ̆ kơnong kơ ƀơi plơi prong Buôn Ma Thuột ôh mơ̆ ƀơi abih bang hơdôm anih anom amăng tơring čar hơdôm thun rơgao. Khă akă hmâo tơlơi truh lăp hning rơngôt, samơ̆ tơlơi ngă gun jơlan nao rai, luk puk amăng mông lu mơnuih rô nao rai hmâo ngă sat laih anih anom plơi prong, ngă bơngot kơ mơnuih ƀôn sang. Ƀơi anăp tơlơi anai, yak mut thun hră phrâo thun anai, Gơnong bruă hmâo gum hrom laih hăng khul apăn bruă pok pơhai hơdôm bruă pơplih pơkă, yak blung a brơi ƀuh ba glăi bôh tơhnal klă mơn.

“Amăng hơdôm hrơi rơgao, Gơnong bruă pơtô pơhrăm tơring čar Daklak hmâo laih hơdôm hră pơ-ar pok pơhai truh hơdôm bôh sang hră pơđĭ tui tơlơi pơmin kơ čơđai sang hră, rơkâo ƀing čơđai sang hră thâo rơđah tơlơi pơkă lom nao truh ƀơi bah amăng war sang hră khom pơhlôm hơđong klă. Lăi pơhing, lăi pơthâo truh amĭ ama čơđai sang hră, hơdôm Khul amĭ ama čơđai sang hră thâo rơđah tơlơi anai. Biă ñu, hơdôm bôh sang hră gum hrom hăng gong gai plơi pla, khul kông ang, pơgang rơnuk rơnua ƀudah Khul hlăk ai hyu gum djru ƀơi plơi pla djru bruă pơhlôm klă ƀơi jơlan nao rai pơ̆ hơdôm bôh bah amăng war sang hră”./.

Tuấn Long/VOVTN čih

Siu H’ Prăk pơblang