VOV4.Jarai - Hmâo lu tơhnal gal kiăng đĭ kyar samơ̆ truh ră anai bruă tuai čuă ngui Daklak ăt dô̆ ataih mơn hăng tơlơi čang rơmang. Tơring čar Daklak glăk gir run pok prong pơlir hơbit, wot amăng tơring čar hăng pơlir hơdôm bôh tơring čar kiăng pơjing rŭ tơgŭ kơ tuai čuă ngui ƀơi tơring čar đĭ kyar.

Tơring čar Quảng Bình lĕ sa amăng hơdôm bôh tơring čar pơlir rah bruă tuai čuă ngui hăng Daklak yua kơ hơdôm tơlơi djơ̆ hrom gah dlai tlô, anih anom hiam. Jê̆ hăng anai, 2 bôh tơring čar hmâo črông lô laih bôh yôm kơsem min anih anom sĭ mơdrô, pok jơlan por Đồng Hới – Buôn Ma Thuột hăng lu bôh yôm gum hrom pơkon amăng 5 thun pơ̆ anăp. Ơi Đặng Đông Hà, Kơ-iăng Khua Gơnong bruă tuai čuă ngui tơring čar Quảng Bình lăi lĕ, Daklak hăng Quảng Bình hmâo hrom tơlơi čang rơmang pơđĭ kyar bruă tuai čuă ngui, pơdơi pơdă, samơ̆ ăt hmâo mơn lu anô̆ pha ra kiăng ngă tui, pơdŏng pơjing hơdôm anih anom tuai čuă ngui hmư̆ hing yôm phăn:

“Hrom hăng pơdŏng pơjing anih anom tuai čuă ngui lĕ, pơtrut kơtang bruă lăi pơhư̆č hăng pơlir hơbit. Ră anai tơlơi pơplih mrô, lăi pơhư̆č, pơlir hơbit, marketing jing yôm phăn biă. Hăng tŭč rơnuč ñu lĕ anom bơwih ƀong ăt gơgrong hlâo mơn hăng hơdôm bôh ƀirô wai lăng kơnuk kơna ăt kơtưn mơn bruă wai lăng kơnuk kơna mơng pô kiăng wai lăng klă rah kông ngăn dlai tlô tuai čuă lăng, laih anun ngă gal rah kơ anom bơwih ƀong pơđĭ kyar bruă wai lăng tuai čuă ngui klă hloh”.

Daklak kĭ jơlan hơdră pơkôl gum hrom pơđĭ kyar tuai čuă ngui hăng lu tơring čar, ƀôn prong

Hlâo kơ anun, amăng blan 3/2022, Gơnong bruă bôh thâo, bơkơjăp drơi jăn hăng tuai čuă ngui tơring čar Daklak ăt hmâo gum hrom laih hăng Gơnong bruă tuai čuă mgui tơring čar Khánh Hòa pơphun Bơkơtuai pơtrut, lăi pơhư̆č hăng tô nao rai anih anom tuai čuă lăng. Yă Nguyễn Thị Lệ Thanh, Khua Gơnong bruă tuai čuă ngui tơring čar Khánh Hòa brơi thâo: wot 2 tơring čar leng kơ hmâo anô̆ gal pha ra pioh pơđĭ kyar hơdôm anih anom čuă lăng, tơdah kah hăng Khánh Hòa kơtang gah anih anom tuai čuă lăng ia rơsĭ, bul ia rơsĭ lĕ, tơring čar Daklak hmâo hơdôm anih anom tuai čuă lăng dlai tlô, anih anom hiam, čư̆ siăng kriăng bôh pơtâo. Anai lĕ tơlơi djru nao rai klă biă kơ dua bôh tơring čar, pơjing hơdôm tour lu mơta gah anih anom tuai čuă ngui hăng hơdôm tơlơi lông lăng ngă pơhư̆č tuai čuă ngui.

 “Ƀing gơmơi amra črâo ba hơdôm sang bruă tuai čuă ngui ăt kah hăng gum hrom hăng Khul wai lăng tuai čuă ngui Nha Trang – Khánh Hòa tô nao rai na nao kiăng pok pơhai pơlir hơbit kual, bơkơtuai nao rai na nao, hmâo hơdôm jơlan hơdră klah čun ƀơƀiă, klah čun kiăng pơsit mă tŭ tơlơi găn rơgao. Hluai tui anun Gơnong bruă wai lăng tuai čuă ngui ăt amra ruah mă mơn tơlơi gum pơhiăp hăng hmâo hơdôm bruă pok pơhai tô̆ tui ba glăi bôh tơhnal hloh bruă mă pơđĭ kyar pơlir hơbit kual kơplah wah Khánh Hòa hăng Daklak”.

Daklak hmâo lu anih anom hiam hơđăp

Hrom hăng anô̆ gal anih anom hiam hơđăp, Daklak dô̆ jing kual phun Dăp Kơdư, gêh gal pioh tô nao rai bruă tuai čuă ngui hăng hơdôm bôh tơring čar amăng kual, biă ñu hăng tơring čar Lâm Đồng, anih anom hmâo pơjing laih anăn păn anih anom čuă lăng hmư̆ hing. Yă Nguyễn Thị Bích Ngọc, Kơ-iăng Khua Gơnong bruă bôh thâo, bơkơjăp drơi jăn hăng tuai čuă ngui tơring čar Lâm Đồng brơi thâo, dua bôh tơring čar glăk gir run hơkrŭ glăi hơdôm tơlơi gun gah bruă rô nao rai, kiăng bruă tuai čuă ngui sit nik dưi tô nao rai:

“Ră anai mơng Lâm Đồng nao pơ̆ Daklak năng ai ñu giăm truh 200km, jơlan nao rai tơnap tap. Dua tơring čar glăk ba tơbiă rơwang bruă pơkra jơlan đuăi hmar mơng Lâm Đồng nao Daklak, mơng anun tô hăng hơdôm bôh tơring čar kual Dăp Kơdư. Hăng čang rơmang tañ pơplih pơkra hăng pơđĭ tui, hrom hăng anun pơkra phrâo jơlan nao rai, ngă gal brơi klă kơ tuai hyu čuă lăng nao pơ̆ 5 bôh tơring čar kual Dăp Kơdư. Sa bruă dong anun lĕ pơkă tơhnal bruă tuai čuă lăng tâ̆o klă, hrom hăng anun čih pơkra tơhnal kiăng pơsitt hơdôm bruă mă gah tuai čuă ngui mơng pô”.

Bôh thâo đưm lu mơta mơng djop djuai ania hơđăp ƀơi anai

Tui hăng ơi Đặng Gia Duẩn, Kơ-iăng Khua Gơnong bruă bôh thâo, bơkơjăp drơi jăn hăng tuai čuă ngui tơring čar Daklak, hăng 49 djuai ania glăk dô̆ hơdip mơda ƀơi tơring čar, Daklak hmâo bôh thâo lu mơta hăng pha ra. Hơdôm hrơi rơgao, tơring čar hmâo laih lu Akô̆ bruă rơđah bơdjơ̆ nao pơđĭ kyar bruă tuai čuă ngui, pơgang hăng ngă tui anô̆ yôm hơdôm gru grua đưm ăt kah hăng Tơlơi pơtrun pơsit tui akô̆ bruă pơgang bôh thâo čing hơgor. Jơnum Ping gah tal 17 mơng tơring čar ăt hmâo pơsit pơđĭ kyar mơn bruă tuai čuă ngui jing sa amăng bruă mă phun. Anai lĕ hơdôm hơdră pơtrun phun pioh pơkĕ hrom pơđĭ kyar bôh thâo hăng pơđĭ kyar tuai čuă ngui ƀơi tơring čar. Ơi Đặng Gia Duẩn lăi:

“Ƀing gơmơi amra gir run ngă tui hơdôm črăn bruă đing nao hlâo, hơdôm ring bruă hơpă, hơdôm anih anom hơpă amra ngă tui klă mơ̆ iâu pơhư̆č tuai čuă lăng lĕ amra đing nao hlâo tuh pơplai, ngă pơhư̆č jai hrơi jai lu hloh tuai nao čuă lăng hăng lu ngăn rơnoh tuh pơplai kơ tơring čar hluai tui hơdôm bruă mă anun. Bơ̆ Daklak pha ra hăng hơdôm tơring čar pơkon ƀơi hơpă? Sit yơh ñu khom lĕ gru grua bôh thâo mơng neh wa djop djuai ania amăng tơring čar, amăng anun hmâo lu djuai ania ƀiă hơđăp hmâo gru grua bôh thâo pha ra hăng pơkĕ hrom pơđĭ kyar tuai čuă ngui, kiăng ƀing ta čang rơmang prăk pơhrui mơng pơđĭ kyar tuai čuă ngui, ñu amra gum hơgôp yôm phăn amăng GDP mơng tơring čar pơ̆ anăp anai”.

Hăng lu anô̆ gal pioh pơđĭ kyar lu mơta hơdră tuai čuă ngui, Daklak glăk hmâo hơdôm yak nao pioh mă yua hăng pơđĭ kyar tuai čuă ngui kơtang hloh. Amăng anun, bruă pơtrut kơtang tô nao rai, pơlir hơbit hăng hơdôm bôh tơring čar amăng đơ đam dêh čar dưi čang rơmang amra pơjing pran rŭ tơgŭ kơtang kơ tuai čuă ngui, djru gơnong bruă măi mok ƀu hmâo asap amra pơjing rai lu nua yôm hloh kơ tơlơi pơđĭ kyar bơwih ƀong, mơnuih mơnam ƀơi tơring čar./.

H’ Xíu: Čih – Siu H’ Prăk: Pơblang

Ảnh: