Tui lăi pơthâo, tal plĕ hră pơphun ngă pô, djơ̆ tơlơi phiăn, pơhlôm rơnuk rơnua hăng anai jing hrơi jơnum prong amăng abih bang mơnuih. Đơ đam tơring čar hơmâo 2.120 kual plĕ hră hăng 2.118 grup plĕ hră; amăng anun hơmâo 11 kual pơphun plĕ hră tañ ƀiă mơng lơ 14/3. Mrô mơnuih ƀôn sang Dak Lak nao plĕ hră truh 99,96%. Tui jŭ yap jang jai, tơring čar Dak Lak hơmâo ruah djop 15 čô Khua pơ ala mơnuih ƀôn sang dêh čar tal XVI tui mrô jao. Hăng khua mua pơ ala mơnuih ƀôn sang tơring čar rơwang thun 2026-2031, hơmâo 84 čô mơnuih ruah đĭ, pơhlôm djơ̆ bruă dưm dăp, djơ̆ tơlơi pơkă. Gưl să, đơ đam tơring čar hơmâo 2.443 čô mơnuih ruah ngă khua pơ ala mơnuih ƀôn sang (kơƀah 1 čô tui tơlơi rơkâo).

Amăng mông jơnum, Jơnum min plĕ hră tơring čar Dak Lak ăt lăi pơthâo ƀing mơnuih ruah ngă khua pơ ala mơnuih ƀôn sang tơring čar rơwang thun 2026-2031 tui rĭm anih plĕ hră. Bruă lăi pơthâo hơmâo pơƀuh brơi tong ten djơ̆ hăng tơlơi pơkă amăng tơlơi phiăn plĕ hră ruah khua. Tơdơi kơ lăi pơthâo ƀing mơnuih ruah ngă khua mua, Jơnum min plĕ hră tơring čar Dak Lak amra pơgiong hră pơ-ar kiăng mơ-it nao hơdôm anom bruă gơnong glông tui tơlơi pơkă.