Ngă tui phiăn juăt gum hrŏm hơbit, hăng pran jua gum djru tơdruă, Ping gah tơring čar Dak Nông pok phun bruă gum pơčruh djru neh wa răm rai yua kơ kơthel tal 3 ba truh. Tơdơi kơ ngă lơphet pok phun. Jơnum min djop djuai ania mơnuih mơnam dêh čar Việt Nam tơring čar Dak Nông hmâo rơkâo djru 1 klai prăk. Ping gah tơring čar Dak Nông iâo pơthưr djop gưl mơnuih ƀôn sang amăng tơring čar gum tơngan hrŏm, pran jua, hmâo ƀiă pơčruh ƀiă, hmâo lu pơčruh lu, gum hrŏm djru ba mơnuih ƀôn sang hơdôm bôh tơring čar bơdjơ̆ nao yua kơ kơthel tal 3 yak rơgao tơlơi tơnap tap, pơsir răm rai tơdơi kơ kơthel ia ling dăo ngă. Ping gah tơring čar Dak Nông jao kơ Jơnum min djop djuai ania mơnuih mơnam dêh čar Việt Nam tơring čar ngă pô phun, tŭ mă tơlơi gum pơčruh, pioh djru brơi neh wa răm rai, pơhlôm hmao tlôn, ba glăi bôh tơhnal. Ơi Trần Minh Quân, Kơ-iăng Khua Jơnum min djop djuai ania mơnuih mơnam dêh čar Việt Nam tơring čar Dak Nông brơi thâo, ƀơi anăp, tơring čar rơkâo djru 1 klai prăk.

“Khă tơring čar dô̆ tơnap tap, samơ̆ ngă tui phiăn juăt mơ̆ng djuai ania gum hrŏm hơbit, gum djru nao rai tơdruă, dưi hmâo tơlơi črâo ba mơ̆ng Ping gah tơring čar lĕ Jơnum min djop djuai ania mơnuih mơnam tơring čar iâo pơthưr, pơsur djop mơnuih ƀôn sang amăng tơring čar. Hơdôm mơnuih hmâo tơlơi gal gum pơčruh lu hloh, hơdôm mơnuih hmâo tơlơi gal ƀiă hloh lĕ gum pơčruh ƀiă, pơkrem ƀơƀiă pioh djru neh wa gah Kơdư dêh čar bơdjơ̆ nao mơ̆ng kơthel ia ling dăo ba truh".

Sa bruă mă ngă lu mơnuih ƀôn sang plơi prong Buôn Ma Thuột, tơring čar Dak Lak đing nao, anun lĕ pơphun hơdôm tal pơgiăng gơnam gum djru kơ neh wa kual ia ling dăo gah Kơdư dêh čar. Ayong Bùi Xuân Phong, pô sang rơdêh Phong Thương, juăt đuăi nao rai Thái Bình – Buôn Ma Thuột brơi thâo, hơdôm tal rơdêh pơgiăng gơnam gum djru abih bang gơnam kiăng yua dưi gum pơčruh ba nao pơ̆ hơdôm bôh tơring čar Thái Nguyên, Lào Cai, Yên Bái... pioh djru mơnuih ƀôn sang.

“Hmâo lu rơdêh glăk dô̆ tơguan pơ̆ anun, hăng pran jua hrŏm lĕ 3 mông čơtlăm lơ 14/9 grŭp amra pơgiăng nao mơ̆ng anai truh pơ̆ hơdôm bôh tơring čar Kơdư dêh čar. Ƀơi anai hăng pran jua lĕ dơ̆ bă rơdêh hơpă amra brơi pơgiăng nao hlao mơtăm. Mơ-ak biă yua kơ kơnong kơ 8 mông mơmot tom brơi ƀing gơmơi pơphun jơlan hơdră anai samơ̆ truh mơguah anai neh wa Dak Lak ba nao lu laih. Ƀơi anăp lĕ bơni pran jua mơ̆ng djop mơnuih”.

Lu mơnuih ƀôn sang nao gum djru, mơ̆ng ƀing čơđai sang hră, ƀing neh wa pơgang, mă bruă, ling tơhan, hăng wot ƀing ơi, yă tha. Yă Trần Thị Cảnh, 81 thun, ƀơi plơi prong Bà Rịa - Vũng Tàu, brơi thâo” ñu glăk nao pơ̆ Dak Lak čuă ană đah kơmơi. Lơm hmư̆ hing jơlan hơdră lĕ hmâo yua laih ană tơčô pơgiăng hyu blơi mì tom pioh djru neh wa kual kơthel ai ling dăo ngă.

“Ruă pran jua, rơngôt biă, ƀu thâo ngă hiưm hơpă, kâo tha laih. Ƀuh amăng plăng mơnuih mơnam (facebook) hmâo lăi pơhing hyu bruă mă anai anun kâo hlong ngă tui hlao, gum hơgôp ƀiă pioh djru gum hăng neh wa”.

Bruă mă gum djru neh wa kual ia ling dăo ngă gah Kơdư dêh čar pơphun ƀu yap hrơi mlăm ôh. Hơneč mă mông mơmot, lu mơnuih ăt rô nao mơn ƀơi kual Tơdrŏn lak 10/3, plơi prong Buôn Ma Thuột, tơring čar Dak Lak pioh gum hơgôp hơdôm kơthung mì tôm, ia mơñum, lương krô, braih, sum ao, ao kơsu, ia tơsâo pioh ba nao pơ̆ rơdêh pơgiăng gơnam gum djru kiăng mơ-ĭt kơ neh wa kual Kơdư dêh čar glăk gơgrong ba răm rai prong yua kơthel Yagi ngă. Hrŏm hăng rơkơi hăng ană anet pơgiăng kơthung sum ao truh anih pơƀut amai Lê Thị Bảo Hiên, pơ̆ phường Tân Lợi, plơi prong Buôn Ma Thuột lăi pơthâo:

“Kâo ƀuh neh wa ƀơi Buôn Ma Thuột dưm đĭ hăng dlông plăng mơnuih mơnam, mơguah anai nao mă bruă mơ̆ng thâo tơlơi pơhing anai, anun glăi mơ̆ng mă bruă mơmot kâo hơneč pơhrui pơƀut sum ao kâo nao. Kian rơpa akă ƀong huă hơget ôh. Kâo kiăng mơ-ĭt pran jua mơ̆ng ană mơnuih Buôn Ma Thuột truh neh wa kual Kơdư. Čang rơmang neh wa dưi rơnuk rơnua”.

Hăng jơlan gah “hlơi hmâo pran pơgôp pran, hlơi hmâo gơnam pơgôp gơnam”, bruă pơgiăng gơnam tam nao pơ̆ hơdôm bôh rơdêh pơgiăng prong pioh hmao nao pơ̆ kual Kơdư dêh čar dưi ngă tui klă. Uă tañ ia hâ̆u, mơñum hăt hot ia, ayong Nguyễn Văn Cơ ƀơi phường Tân Lợi, plơi prong Buôn Ma Thuột ră ruai:

“Kâo pơđok amăng glông facebook ƀuh tơlơi pơhing kơnang kơ hlăk ai dŭ brơi gơnam, ƀrô mông anun đuăi rai pơ̆ anai djru dŭ gơnam gum hrŏm djop mơnuih. Hmâo 3 mông laih, ƀing adơi ayong anai dŭ gơnam tam hlâo hmâo hơdôm bôh rơdêh laih. Ƀuh ruă pran jua biă kơ mơnuih ƀơi kual Kơdư, pô dưi djru hơget lĕ djru, dưi ngă hơget lĕ ngă”.

Kơnong kơ amăng sa hrơi mlăm, mơnuih ƀôn sang Dak Lak hmâo pơčruh laih 5 bôh rơdêh pơgiăng gơnam, hơnong ñu rim rơdêh 20 tơn gơnam tam kiăng yua, pioh ba nao kơ neh wa pơ̆ hơdôm bôh tơring čar kual Kơdư glăk bơdjơ̆ nao prong yua kơ ia ling dăo ngă./.