Tui hăng ƀing khua, mơnuih ping gah hăng Mơnuih ƀôn sang Dap Kơdư - Dơnung Tong Krah, tơlơi yom hloh tơdơi kơ mông Jơnum ping gah dêh čar tal 14 jing bruă pok pơhai tơlơi pơtrun khŏm tañ, khut khăt, hăng kiăo tui tơlơi hơmâo sit. Ayong Bùi Viết Tiệm, ƀut 7, să Čư̆ Sê, tơring čar Gia Lai lăi, hơdôm tơlơi pơtrun prong sit dưi mut amăng tơlơi hơdip lơ̆m hơmâo pơsit hăng bruă brơi mơnuih ƀon sang lăng djơ̆ pran, lăng ƀuh boh tŭ yua:“Hơdôm ding jum, anom bruă ječ ameč lăng glăi, pơkra glăi tơlơi pơkă dŏ bơrơkua, pơgăn jơlan đĭ kyar; laih dong hơmâo tơlơi pơtrun pơtô brơi tong ten kiăng tơring čar dưi ngă tui ha amăng plĕ. Hơdôm boh tơring khŏm pơjing tơlơi pơtrun anai hăng bruă ngă sit nik, bruă mơ̆ mơnuih ƀôn sang dưi ƀuh, dưi thâo. Mơ̆ng pơplih ngă hră pơ-ar, pơđĭ tui anŏ klă bruă čar, truh kơ djru pơčrâo brơi jơlan bơwih ƀong hơđong kjăp, pơđĭ tui prăk pơhrui”.

Tui tơlơi lăng mơ̆ng anom mơdrô, yă Nguyễn Thị Diễm Kiều, sa anom mơdrô ƀơi să Đăk Đoa, tơring čar Gia Lai čang rơmang tơdơi kơ mông Jơnum ruah khua ping gah dêh čar tal 14, hơdôm boh tơring amra hơmâo hơdră djru sit nik hloh kơ anom mơdrô, biă ñu mă yua boh thâo ia rơgơi hăng boh thâo mrô:“Kâo čang rơmang tơdơi kơ mông jơnum, tơring čar amra hơmâo tơlơi djru kơ anom mơdrô, biă ñu lĕ mă yua boh thâo ia rơgơi, hơmâo tơlơi gum djru tuh pơ alin gah măi mok, ia rơgơi, djru pơtŏp brơi mơnuih mă bruă kiăng rơguăt, pơtô mă yua boh thâo mrô. Čang rơmang kơnuk kơna djru brơi dong kơ anom mơdrô dưi hơmâo gơnam sĭ mơdrô điện tử hmư̆ hing, đah mơ̆ng huăi hơmâo bruă anom mơdrô ngă biă mơ̆ ƀu dưi pơhno ôh hăng gơnam pơkra mă ča, sĭ rơgeh gah rơngiao adih”.

Pơ hơdôm plơi pla ataih yaih, kual mơnuih ƀôn sang djuai ƀiă, čang rơmang prong hloh tơdơi kơ mông Jơnum ping gah dêh čar tal 14 ăt jing tơlơi lăng ba sit, kiăo tui tơlơi kiăng mơtăm. Ơi Hmên, djuai ania Bahnar, pơ plơi Tuơh Ktu, să Đăk Đoa, tơring čar Gia Lai lăi:“Kâo čang rơmang pơ anăp anai Ping gah, Kơnuk kơna lăng ba dong, git gai lŏn ia ta hrưn đĭ, neh met wa ha pran djru brơi. Ping gah hơmâo hơdră djru lăp djơ̆ kiăng lŏn ia ta jai hrơi đĭ kyar kjăp kơtang hloh”.

Tui hăng yă H’Hương Bkrông, djuai ania Êđê pơ phương Ea Kao, tơring čar Dak Lăk, Jơnum ruah khua Ping gah dêh čar tal 14 kiăng ƀing khua khŏm jê̆ giăm, thâo hluh ană plơi, pơhmư̆ tơlơi hơget ană plơi kiăng hăng ĕp jơlan pơsir brơi hlao mơtăm:“Čang rơmang hăng rim čô mơnuih ngă khua amra pơtrut tui tơlơi gơgrong bruă mơ̆ng pô hloh dong, kiăng thâo tơlơi hơget ană plơi kiăng, pơđing hmư̆, pơhlom tơlơi dưi, tơlơi pơmin, tơlơi rơkâo đĭ lăp djơ̆ mơ̆ng ană plơi pla”.

Tui hăng ơi Võ Chí Vương, Khua Gơnong bruă čar tơring čar Khánh Hòa, kiăng lăp djơ̆ hăng jơlan ngă bruă lăng nao pơ anăp, ataih hloh, tơlơi čang prong mơ̆ng Jơnum min ruah khua ping gah dêh čar tal 14, ƀing khua, mơnuih mă bruă čar kiăng pơđĭ tui dong. Boh tŭ yua amăng bruă mă hăng anŏ tŭ ư mơ̆ng mơnuih ƀôn sang, anom mơdrô jing anŏ yom hloh či pơtŏng glăi anŏ klă hă aka mơ̆ng gong gai:“Kơ bruă mă mơ̆ng ƀing khua, mơnuih apăn bruă čar amăng mông anai, hơdôm hơdră ngă bruă akŏ phun hơmâo: pơđĭ tui tơlơi rơguăt bruă mơ̆ng ƀing khua hrŏm hơbit hăng dăp glăi anom bruă, pơhlom mă bruă tŭ yua; pơplih kơtang bruă ruah, dưm dăp, mă yua ƀing khua djơ̆ tui bruă hơmâo jao; laih dong lăp đing nao bruă pơtô pơjuăt ƀing khua, mơnuih mă bruă čar, kiăo tui bruă jao phrâo amăng rơwang bruă phrâo”.

Mơ̆ng tơlơi hơmâo sit ƀơi Dap Kơdư - Dơnung Tong Krah ta ƀuh laih, tơlơi čang rơmang prong hloh tơdơi kơ mông Jơnum ruah khua ping gah dêh čar tal 14 ƀu kơnong jing jơlan ngă bruă akŏ phun đôč ôh, ăt jing tơlơi pơplih rơđah rơđông, tŭ yua amăng bruă mă. Lơ̆m jơlan hơdră ngă bruă mơ̆ng Kơnuk kơna, mơ̆ng ding jum, anom bruă hăng plơi pla hơmâo pok pơhai dưm kơnar, khut khăt, hăng mă mơnuih ƀôn sang hăng anom bơwih ƀong yơh phun, pran jua mơ̆ng Jơnum ping gah dêh čar tal 14 amra mut amăng tơlơi hơdip, bang hyu djŏp, pơtrut lŏn ia ta đĭ kyar tañ hăng hơđong amăng rơwang phrâo./.