Čih djă pioh bôh nik ƀơi anih anom sĭ mơdrô, truh ră anai, gơnam tam pioh kơ Tết tui phiăn juăt Giáp Thìn 2024 ƀơi tơring čar Gia Lai lu biă mrô hăng mơta gơnam, plăng gơnam pioh mơnuih ƀôn sang blơi prăp. Hrŏm hăng hơdôm bôh sang čơ mơ̆ng hlâo, hơdôm bôh siêu thị, anih anom prong sĭ mơdrô gơnam tam jing hơdôm anih anom ngă pơhưč lu mơnuih blơi gơnam yua kơ pơhlôm phun akha, anih anom pơkra. Yă Phạm Thị Diện, ƀơi să Čư̆ An, plơi prong An Khê, tơring čar Gia Lai, hyu blơi prăp ƀơi siêu thị Co.opmart plơi prong Plei Ku, lăi:

 “Kâo ƀuh lu gơnam ƀơi anai hmâo lu mơta hăng lăp đing nao biă, ƀơi sang čơ gah rơngiao huĭ gơnam ngă mă ča lu hăng ƀu pơhlôm kơ tơlơi suaih pral, gơnam ƀơi anai lu mơta hiam, pơdă lăng pơhưč pran jua biă”.

Ơi Bùi Quốc Bình, Khua Siêu Thị Co.opmart plơi prong Plei Ku, tơring čar Gia Lai brơi thâo, kiăng djơ̆ tui tơlơi kiăng blơi, anom hmâo blơi glăi laih sa dua mơta gơnam lu pioh djă pioh gơnam kơ Tết.

 “Rơnoh blơi mơ̆ng mơnuih ƀôn sang amăng tal Tết tui phiăn juăt Giáp Thìn 2024 đĭ năng ai ñu 3 wot bơhmu hăng hơdôm hrơi tơđar, ƀu pioh tơlơi kơƀah gơnam đĭ nua, gum hrŏm hơđong nua gơnam sĭ lĕ anom prăp lui năng ai 110 klai prăk pioh kơ neh wa tal tết anai. Ră anai mrô gơnam anai ƀing gơmơi ăt prăp lui laih hlâo kơ Tết năng ai ñu 2 blan hăng ră anai kah hăng abih bang năng ai ñu mơ̆ng 60-70% mrô gơnam Tết hmâo tum pơƀut ƀơi siêu thị. Gơnam khom hmâo phun akha pơkra rơđah, khom pơhlôm anô̆ klă hơdjă gơnam tam ƀong huă”.

Tui hăng tơlơi pơkă lăng hlâo mơ̆ng Gơnong bruă sĭ mơdrô tơring čar Gia Lai, abih bang rơnoh ba hyu gơnam tam hăng prăk pơhrui glăi blan Tết tui phiăn juăt him lăng hmâo 17.500 klai prăk. Kiăng pơhlôm djop gơnam kiăng hloh amăng tal Tết, Gơnong bruă sĭ mơdrô rơkâo hơdôm bôh anom sĭ mơdrô pok pơhai kơčăo bruă djă pioh gơnam kiăng hloh pơhlôm hơđong bruă sĭ blơi, ngă tui ba glăi bôh tơhnal jơlan hơdră hơđong nua gơnam. Hrŏm hăng anun, pơkôl gơnam kiăng yua khom pơhlôm klă, hmâo nua pơkă tum djop amăng hră pơ-ar, phun akha gơnam pơkra rơđah. Ơi Rčom Jen, Kơ-iăng Khua Gơnong bruă sĭ mơdrô tơring čar Gia Lai, lăi:

 “Gơnong bruă sĭ mơdrô hmâo mă yua laih kơčăo bruă djă pioh gơnam tam 2024, pel ĕp wai lăng gơnam tam, hơdôm tơlơi pơkă kơ pơhlôm gơnam ƀong huă, sĭ mơdrô tui jơlan măi mok. Rơgao kơ thâo tơlơi lăng hrŏm bruă sĭ blơi gơnam hơđong biă. Ngă tui hơdôm jơlan hơdră pơsur blơi gơnam, pơjing lu jơlan hơdră ba gơnam glăi pơ̆ plơi pla, gum hrŏm hăng wai lăng anih anom sĭ mơdrô pioh pel ĕp gơnam tam, tơdah thâo tañ gơnam ngă mă ča, ƀu rơđah phun akha gơnam lĕ amra gum hrŏm hăng wai lăng anih anom sĭ mơdrô pơsir tơpă tui tơlơi phiăn mă yua ră anai”.

Kiăng pơhlôm kơnar mrô gơnam sĭ hăng blơi, pioh mơnuih ƀôn sang blơi prăp, Jơnum min mơnuih ƀôn sang tơring čar Dak Lak pok pơhai jơlan hơdră hơđong bruă blơi sĭ gơnam kiăng hloh tal rơnuč thun 2023 hăng Tết tui phiăn juăt Giáp Thìn 2024. Hơdôm hrơi hơđong nua gơnam mơ̆ng akô̆ blan 12/2023 truh abih blan 2/2024. Djuai gơnam hơđong nua hmâo: Braih pơdai, gơnam ƀong huă (mơnong un, mơnŭ bip, bôh bip bôh mơnŭ, ia rơmă, sik, ƀô̆t ngok hăng hơdôm gơnam ƀong huă pơkra pơjing, añăm pơtăm hla rok, hơbơi pơtơi bôh troh), gơnam yua hơbai ƀong. Anai lĕ hơdôm djuai gơnam, gơnam kiăng yua hloh, tơlơi kiăng mă yua lu; tañ thâo gah mrô gơnam hmâo hăng kiăng yua, nua gơnam.

Tơring čar Dak Lak hmâo pơsur 11 bôh anom bơwih ƀong, siêu thị, hơdôm bôh anih anom sĭ mơdrô gơnam gum hrŏm jơlan hơdră hơđong nua gơnam tal rơnuč thun 2023 hăng Tết tui phiăn juăt Giáp Thìn 2024. Pơkă hlâo mrô prăk yua pioh djă lui gơnam kơ hrơi Tết rơbêh kơ 473 klai prăk, djop brơi giăm truh 27% mrô kiăng blơi yua mơ̆ng mơnuih ƀôn sang amăng tơlơi kơƀah gơnam thơ. Rơngiao kơ anun, mrô gơnam ƀơi hơdôm bôh sang čơ, anih anom sĭ mơdrô ăt jing sa jơlan prong djop brơi mrô gơnam kơ mơnuih ƀôn sang blơi amăng tal Tết. Ơi Lưu Văn Khôi, Khua Gơnong bruă sĭ mơdrô tơring čar Dak Lak brơi thâo, hrŏm hăng hơđong mrô gơnam kơ tết, tơring čar ăt pơtrut kơtang hơdôm bruă pơgăn gơnam tam ƀu klă hiam hăng leč pơdar amăng sĭ mơdrô:

 “Gơnong bruă sĭ mơdrô hrŏm hăng Jơnum min mơnuih ƀôn sang hơdôm bôh tơring glông, plơi prong amra hmâo hơdôm jơlan pơsir rơđah pioh djơ̆ djop gơnam ăt kah hăng pơhlôm nua gơnam hơđong. Hrŏm hăng anun lĕ kơtưn bruă pel ĕp wai lăng kiăng pơgăn gơnam ngă mă ča, gơnam ƀu klă hiam laih anun pơgăn leč pơdar amăng sĭ mơdrô".

Kiăng pơgăn tơlơi djă kong, đĭ nua ƀu djơ̆ phiăn pơkă; pơhlôm hơđong anih anom sĭ mơdrô, Anom wai lăng anih anom sĭ mơdrô tơring čar Dak Lak phrâo pok pơhai kơčăo bruă pơphun tal đing nao pơgăn gơnam sĭ mơdrô dŏp, leč pơdar amăng sĭ mơdrô hăng gơnam ngă mă ča tal hlâo, amăng hăng tơdơi kơ Tết tui phiăn juăt Giáp Thìn thun 2024. Hrŏm hăng anun hăng Grŭp ăt amra pơphun lăng tui kơjăp bruă sĭ mơdrô ia xăng ia jâo, ayuh gas, ƀu pioh hmâo tơlơi djă kŏng gơnam, đĭ nua ƀu djơ̆ phiăn pơkă pioh djru pơhlôm hơđong bruă blơi sĭ gơnam kơ hrơi Tết kơ mơnuih ƀôn sang./.