Amăng 2 rơnuk blah kơdŏng ayăt Prang hăng Mi, să guai dêh čar ƀơi Quảng Trực, tơring glông Tuy Đức, tơring čar Dak Nông lĕ anih pơdong, pơđĭ kyar bruă ngă hơkrŭ ƀơi kual dơnung yŭ Dap Kơdư. Hăng gru grua phiăn juăt ư-ang, sông kơtang, gơgrong kợăp amăng bruă ngă hơkrŭ, thun 2019, să Quảng Trực dưi hmâo Khua dêh car tŭ yap lĕ să pơhlôm kual hăng čơkă Ƀằng dăp gru grua gưl tơring čar. Yă Thị Brao, pô hmâo arăng đăo kơnang ƀơi ƀôn Bu Prăng 1A, să Quảng Trực brơi thâo, neh wa djuai ania Bơnông ƀơi anai ư-ang biă kơ phiăn juăt gru grua ngă hơkrŭ ư-ang. Neh wa gir run na nao djă pioh, ngă tui phiăn juăt anun, wot amăng bruă bơwih ƀong huă, ngă đang hmua.Neh wa ƀing gơmơi ư-ang biă kơ gru grua ngă hơkrŭ ƀơi kual lŏn sông kơtang Quảng Trực anai. Hơdôm thun rơgao ƀing gơmơi leng kơ pơsur neh wa gum hrŏm hơbit, đăo kơnang na nao, tui Ping gah, Kơnuk kơna pioh pơdŏng plơi pla, lŏn ia pơdrong asah klă hiam. Ƀing gơmơi ăt pơtô na nao mơn ană bă khom djă pioh gru grua ngă hơkrŭ ư-ang. Amăng tal thun phrâo anai mơn, kâo rơkâo hơ-ưč hmưi neh wa ƀơi plơi pla ala ƀôn hăng mơnuih ƀôn sang đơ đam dêh čar sa thun phrâo truh kih, gum hrŏm hơbit na nao, tŭ ư hrŏm pioh pơdŏng plơi pla, lŏn ia jai hrơi jai pơđĭ kyar”.

Mơnuih ƀôn sang djop djuai ania amăng tơring glông Ia Pa, tơring čar Gia Lai pơ-ư ang biă mă kual lŏn mơnuih ƀôn sang thâo ngă hơkrŭ. Amăng đơ đam tơring glông hơmâo 11.100 boh sang anŏ, hăng 57 rơbâo čô mơnuih, amăng anun 70% mrô mơnuih ƀôn sang djuai ƀiă, lu kơ Jarai hăng Bahnar. Anai lĕ tơring glông ngă hơkrŭ đưm adih lu biă mă; khul tơdăm dra hlăk ai ngă bruă hơkrŭ tŭ yua mơ̆n amăng bruă, tơdơi anai jing mơnuih apăn bruă ngă khua mua pơprong amăng tơring glông. Jing rơnuk hlăk ai tŭ yua mơ̆ng kual lŏn hơmâo gru grua hiam hơkrŭ, R’Ô Hôk, dŏ ƀơi să Ia Amrŏn, tơring glông Ia Pa lăi:

“Să Ia Amrŏn, tơring glông Ia Pa, tơring čar Gia Lai lĕ kual lŏn hing ang ngă bruă hơkrŭ. Anai lĕ anih ngă hơkrŭ đưm laih anun hơmâo tơgŭ blah ayăt kiăng pơklaih rơngai djuai ania. Tơdơi kơ lŏn ia rơngai, hơmâo tơlơi djru mơ̆ng Ping gah, kơnuk kơna, mơnuih ƀôn sang thâo gum pơgôp, gir run mă bruă, bơwih ƀong huă kiăng lŏm lui tơlơi rơmŏn rơpa ƀun rin. Yua kơ anun, lu sang anŏ jai hrơi pơđĭ kyar, tơlơi hơdip mơda ƀrư̆ hrơi đĭ tui, pơblih phrâo na nao. Kiăo tui yak rơbat mơ̆ng hlăk ai tơring glông, kâo ăt ba jơlan hlâo kiăo tui bruă hơkrŭ. Laih dơ̆ng, pơtô pơblang, jak iâu ană plơi ngă djơ̆ jơlan hơdră pinggah, tơlơi phiăn kơnuk kơna; gir run bơwih ƀong huă pơđĭ kyar, lŏm lui tơlơi phiăn ƀu djơ̆ hơđăp, pơgang ayuh hyiăng jum dar, pơtô lăi ană amôn gir hrăm hră truh kih, djru man pơdong plơi pla anih ngă hơkrŭ đưm jai hrơi pơdong sah”.