Hrơi ƀong têt ƀu djơ̆ kơnong mông jơngum mơak đôč ôh, dŏ jing mông lir hơbit bưp nao rai bơ ră ruai kah pơpha tơlơi mơak bruă mă hơdip mơda rim hrơi, tơlơi jĕ giăm plah wah ling tơhan hăng ană plơi, hơmâo ngă bang bơngač đut jơlan guai dêh čar. Khoa Điềm, pô čih tơlơi pơhing dŏ ƀơi kual Dap Kơdư hơmâo tơlơi čih  Dik dăk mơak klă čơkă têt ƀơi guai dêh čar Kon Tum.

Krah jơlan nao pơ puih kơđông tơhan pơgang guai dêh čar giăm lŏn ia Lao hăng Kur, hơdôm hrơi anai sit mơ̆n hmư̆ ik ăk jơnum ngui mơak čơkă thun phrâo. Ƀong têt ƀơi 13 boh să ter guai dêh čar gah 4 boh tơring glông : Đek Glei, Ngok Hôi, Sa Thầy hăng Ia HDrai tơring čar Kon Tum ƀuh bă hăng tơlơi sŭ mơak sit nik.

Hrơi mông ngă yang čơkă thun phrâo Ất Tỵ thun anai, anom bruă Khua tơhan pơgang guai dêh čar tơring čar Kon Tum ruah să Ia Đal, tơring glông Ia H Drai pioh pơphun jơlan hơdră anăn  Bơyan bơnga ƀơi guai dêh čar pơđao pran jua ană plơi pla hăng Hrơi mơak anung ƀañ čưng hla mơtah.  Kơnang kơ bruă ngă anai hơmâo rơbêh 6000 čô mơnuih ƀôn sang mơ̆ng 11 boh plơi pla amăng să dưi nao čơkă hrŏm mơak ngă yang thun phrâo djuai ania, dik dăk  ăk or pơphul rah ngui pơtum anung pơkra ƀañ tek ƀañ čưng, anung hăng hla pơtơi mơtah laih anun hơtŭk riă tơnă hơbai; pơphun adoh suang, pơrơguăt drơi jăn; tŭ mă 250 anung gơnam, 400 drăm ƀañ čưng arăng ƀơk.

Đại tá Lê Minh Chính, ding kơna ping gah anom bruă ping gah tơhan pơgang guai dêh čar tơring čar Kon Tum, brơi thâo, ƀơi jơlan guai dêh čar anai pơphun hrơi mơak hrup anai soh, kiăng ngă mơak čơkă thun phrâo brơi mơnuih ƀôn sang jơngum hrŏm:

Thun anai ƀing gơmơi ruah mă să Ia Đal, tơring glông Ia H'Drai yơh să ngă gru pioh pơhrăm glăi kơ abih bang. Djop să dŏ glăi hăng djop puih kơđông tơhan pơgang guai dêh čar ngă hrŏm hăng mơnuih ƀôn sang laih anun gong gai kơnuk kơna ƀơi să pơphun hrŏm, brơi mơnuih ƀôn sang hơmâo anih ƀong mơñum ngui ngor hrŏm ƀing tơhan pơgang guai dêh čar pơdong puih kơđông ƀơi să laih anun jak iâu hơdôm sang bruă mơdrô, ƀing čơmah, ƀing apăn bruă kơnuk kơna djop gưl, djop anom bruă pơčruh hrŏm kiăng dưi hơmâo prăk pơphun hrơi mơak ngui ngor ƀong têt brơi kơ mơnuih ƀôn sang trơi pơđao.

Hmư̆ ik jua čing tơ ua hyu amăng klô, plơi pla, đhơ đhet hla kơ hla gru angin pưh hlăk por amăng djop jơlan glông plơi pla, ƀô̆ mơta pơrơhĕ pĕ tlao hok mơak hrŏm mơ̆ng djop djuai ania mơnuih ƀôn sang dŏ ter jơlan guai dêh čar amăng tơring čar Kon Tum hlăk pơƀuh brơi sa rup rap hrơi mơak tơpư̆ hlư̆ mơak laih anun trơi pơđao.

Thun 2024 tơlơi hơdip mơda mơnuih ƀôn sang amăng kual ter guai dêh čar ƀơi Kon Tum pơblih đĭ lu biă mă yua nua kơphê, kơsu, hơbơi plum đĭ đăi. Lu hơbô̆ bruă yua ling tơhan pơgang guai dêh čar ƀơi Kon Tum pok pơhai hăng ngă hrŏm kah hăng: Pơpha mơnuih ping gah mơ̆ng puih kơđông glăi apăn bruă amăng să, plơi pla, djru ba lu sang anŏ tơhan pơgang guai dêh čar pơčruh prăk blơi rơmô kơ mơnuih ƀun rin ƀơi djop să guai dêh čar rông; rông bơbui brung uai; ngă hrŏm khul đah kơmơi mut phung ƀơi guai dêh čar....hơmâo ba glăi boh tŭ yua djru hơdô rơtuh boh sang anŏ mơnuih ƀôn sang djuai ƀiă ƀun rin dưi pơhrui glăi, pơđĭ tui tơlơi mơak ngă yang čơkă thun phrâo. Ơi Blong Hâm, Phó Kơiăng khua Jơnum min mơnuih ƀôn sang să Đak Yuk, tơring glông Ngok Hôi, brơi thâo:

Dưi hơmâo ping gah, kơnuk kơna, djop anom bruă, tơhan pơgang guai dêh čar tơring čar djru ba, ngă hrŏm djop tơhnal pơkă bơwih ƀong huă mơnuih mơnam amăng tơring čar lĕ ƀing gơmơi dưi ngă hăng ngă lu hloh akŏ bruă jao. Mơnuih ƀôn sang hok mơak prăp lui bruă mă čơkă thun phrâo djuai ania kiăng abih bang mơak hrŏm.

Hrơi blan ngă rơnang glăi hĭ hlâo či truh hrơi tơkuh thun phrâo, sô rơgao thun phrâo truh. Ƀơi ter jơlan guai dêh čar ƀơi tơring čar Kon Tum hơmâo 76 khul grup, rơbêh 550 boh sang anŏ hăng mơnuih ƀôn sang ƀơi 13 boh să čih anăn djru hrŏm pơgang guai jơlan guai dêh čar, pơgang gong tơmeh pơkă guai; hơmâo 3 grup anom bruă hăng 600 boh sang anŏ čih anăn pơgang tơlơi rơnuk rơnua amăng plơi pla. Amăng hơdôm hrơi mơak čơkă thun phrâo ƀong têt, mơak bơyan bơnga, ling tơhan hăng mơnuih ƀôn sang pơ anai ăt ƀu lui ôh bruă pơtă pơtăn brơi răng kơđiăng kơtang hloh. Ƀing khua mua, ling tơhan hăng mơnuih ƀôn sang dŏ treng jơlan guai ăt  dŏ ngă tui bruă pơpha hyu tir, rơbat ter guai hyu ĕp lăng, pơgang tơlơi rơnuk rơnua kơ dêh čar. Đại tá Trần Ngọc Tùng, Kơiăng khua git gai ling tơhan, khua anom bruă pơphô brơi kơ khua tơhan pơgang guai dêh čar tơring čar Kon Tum, brơi thâo:

Djă kơjăp tơlơi glăm ba gơgrong phun amăng bruă mă hrŏm hăng mơnuih ƀôn sang hơdai gum hrŏm ƀing tơhan pơgang guai dêh čar wai pơgang guai lŏn ia, pơgang ngă pô dêh čar, anom bruă khua tơhan pơgang guai dêh čar tơring čar hơmâo pơtrut bruă pơtô pơblang, pôr pơthâo kơ mơnuih ƀôn sang akŏ pơdong anih dŏ tơdron blah amăng lăm mơnuih ƀôn sang lir hơbit pơđĭ tui tơlơi thâo hluh pơgang rơnuk rơnua lŏn ia. Pơđĭ kơtang bruă mă, tơlơi glăm ba mơ̆ng khul grup, djop mơnuih amăng bruă wai pơgang jơlan guai dêh čar, wai lăng pơgang hơđong bruă kơđi čar, tơlơi rơnuk rơnua mơnuih mơnam amăng lăm dêh čar.

Hăng hơdôm tơlơi pơblih hiam klă amăng tơlơi hơdip mơda bơwih ƀong huă mơnuih mơnam, tơlơi mơak čơkă ngă yang thun phrâo djuai ania ƀong têt mơ̆ng ling tơhan hăng mơnuih ƀôn sang ƀơi guai dêh čar tơring čar Kon Tum jai ik ăk kơdok kơdor hloh. Têt ƀơi jơlan guai dêh čar ƀu kơnong kơ hrơi mông pơtum jơngum đôč ôh, dŏ jing mông bơ ră ruai kah pơpha tơlơi thâo thăi, lir hơbit pran jua mơak ling tơhan, ană plơi, dưi bang bơngač lu hok mơak prong ƀơi jơlan guai dêh čar ta khăp ƀu-eng.