VOV4.Jarai-Mơguah lơ 14/10 ƀơi Hà Nôị, Ding jum kơđi čar, Khul khua mua git gai ping gah dêh čar jơnum lăi pơthâo tong ten hăng pok pơhai ngă tui Hră pơtrun mơ̆ng Ding jum kơđi čar kơ hơdră pơđĭ kyar bơwih ƀong huă mơnuih mơnam hăng pơgang tơlơi rơnuk rơnua kual Dap Kơdư truh thun 2030 lăng nao pơ anăp adih truh thun 2045. Khua git gai ping gah ơi Nguyễn Phú Trọng git gai hăng hơmâo tơlơi pơhiăp pơčrâo yôm kơ mông jơnum.

Ding jum kơđi čar, Khul khua git gai ping gah Jơnum pơđĭ kyar bơwih ƀong huă mơnuih mơnam, pơgang rơnuk rơnua kual treng čư̆ siăng gah Kơdư truh thun 2030, anăp nao truh thun 2045

Phrâo anai, nao jơnum hăng đĭ pơhiăp git gai Jơnum pơƀut bruă mă ngă tui Hră pơtrun mrô 10 hăng Hră klah čun mrô 12 mơ̆ng Ding jum kơđi čar kơ pơđĭ kyar bơwih ƀong huă mơnuih mơnam hăng pơgang tơlơi rơnuk rơnua amăng kual Dap Kơdư, ơi Phạm Minh Chính Khua dêh čar hơmâo lăi pơthâo sa tơlơi hrăm yôm găn rơgao kah hăng khom thâo hluh djơ̆ laih anun djop kơ tơlơi gơgrong, anih mă bruă hăng anŏ yôm djop kual lŏn amăng dêh čar, djop gưl anom bruă; lăi pơthâo tong ten bruă pơđĭ kyar kual Dap Kơdư khom pơtum nao kơ bruă pơsir sa hnong bruă kơđi čar, tơlơi pơmin, bơwih ƀong huă, mơnuih mơnam, pơgang ayuh hyiăng, pơgang lŏn ia, rơnuk rơnua; lir hơbit pơđĭ kyar bơwih ƀong huă hăng đing nao pơsir tơlơi tơnap kơ mơnuih mơnam, jơlan hơdră djru kơ mơnuih djuai ƀiă, tơlơi đăo; pơtrut pran jua pơ-ư ang lŏn ia, hrưn đĭ, gir run mă bruă, gum pơgôp djuai ania kiăng jing pran kơtang; khom hơmâo jơlan hơdră tơlơi phiăn pơhưč lu mơnuih mă bruă pơđĭ kyar, boh nik ñu ngă hrom plah wah kơnuk kơna hăng mơnuih ƀôn sang, abih bang mơnuih djru hrom wơ̆t hăng anŏ tuh pơ alin mơ̆ng dêh čar tač rơngiao.

Nay Jek: Pơblang