Amăng jơnum lăng nao rai mơng ataih hăng hơdôm boh tơring čar Khánh Hòa, Gia Lai hăng Dak Lak, Lâm Đồng, Tây Ninh, Khua dêh čar ơi Phạm Minh Chính lăi pơtong, bruă hơjan ia ling dăo hăng bruă rŭ pơdong glăi anŏ răm rai yua hơjan kơthel ngă hơmâo ding jum kơđi čar, pơkiăo nao ƀing Ding kơna Ding jum kơđi čar nao tơl hơdôm boh ƀon lan git gai, tơña bla, juh alum, rŭ pơdong glăi anŏ răm rai.

Ngă tui tơlơi git gai mơng Ding jum kơđi čar, 4 grup hyu mă bruă yua khua mua Ping gah, kơnuk kơna hơmâo nao tơl hơdôm boh ƀon lan, amăng anun, hơmâo Ding kơna Khul git gai Ping gah Trần Cẩm Tú nao pơ Khánh Hòa, Kơ-iăng Khua dêh čar ơi Nguyễn Hòa Bình nao pơ Dak Lak, Khua ding jum ling tơhan Phan Văn Giang nao pơ Gia Lai, Khua Jơnum min djop djuai ania mơnuih mơnam Việt Nam Bùi Thị Minh nao pơ Lâm Đồng.

Nao pel ĕp tơl anih, git gai bruă rŭ pơdong glăi anŏ răm rai yua hơjan ia ling dăo ƀơi tơring čar Khánh Hòa, Ding kơna Khul git gai Ping gah Trần Cẩm Tú rơkâo tơring čar Khánh Hòa tŏ ngă tui khut khăt tơlơi git gai mơng Ding jum kơđi čar, Khul git gai Ping gah, Khua git gai Ping gah ơi Tô Lâm; mơng Kơnuk kơna hăng Khua dêh čar; rơkâo gưl Ping gah, gong gai djop gưl kiăng nao tơña bla, juh alum pran jua sang anŏ hơmâo mơnuih djai, rơngiă; djru klă hloh brơi mơnuih rơka rơkač.

“Pơtum pơƀut djop ngăn rơnoh, gơnam tam, gir run abih pran jua kiăng dưi nao tơl, djru brơi mơnuih ƀôn sang glăk guang dar amăng hơdôm plơi pla ia dăo dơlăm. Gong gai ƀon lan kiăng pơhlôm anih dŏ jang jai, djru brơi hmao tlôn, djop mơta anun lĕ gơnam yua kiăng hloh brơi mơnuih ƀôn sang; đing nao djru brơi mơnuih tha rơma, ƀing čơđai, đah kơmơi pi kian, ƀing mơnuih amuñ bơdjơ̆ nao; anăm brơi ƀing čơđai kơƀah anih hrăm, kơƀah anih khăm pơjrao brơi mơnuih ƀôn sang”.

Ƀrô tal anai, pơ ala brơi khua mua Ping gah, kơnuk kơna, Ding kơna Khul git gai Ping gah Trần Cẩm Tú jao prăk djru 20 klai prăk brơi Ping gah, gong gai hăng mơnuih ƀon sang tơring čar Khánh Hòa.

Tơdơi kơ plĕ trun rơdêh por ƀơi tơdron rơdêh por Cam Ranh (tơring čar Khánh Hòa) amăng mơmŏt, Kơ-iăng Khua dêh čar ơi Nguyễn Hòa Bình hơmâo nao tơl anih ia ling dăo kơtang hloh ƀơi phường Đông Hòa, tơring čar Dak Lak (tơring glông Đông Hòa, tơring čar Phú Yên hơđăp). Kơ-iăng Khua dêh čar brơi thâo, ñu hning rơngô̆t biă mă hăng hơdôm anŏ rơngiă mơng neh met wa hăng pơsit tong, Ping gah, Kơnuk kơna amra ƀu pioh neh met wa hơjan ôh. Djop tơlơi gum djru kơ gơnam tam, juh alum amra hơmâo pok pơhai tañ hloh hăng ba glăi boh tŭ yua hloh.

“Amăng hrơi mông tơnap tap hloh anai, kiăng đing nao ană mơnuih, tui tơlơi črâo ba mơng Ling tơhan, kông ang dưi ngă tui anai lĕ yôm biă yơh, gơnam tam, sang anŏ ƀing ta amra pơdong glăi tơdơi, Ping gah, kơnuk kơna amra djru brơi dong. Mơ̆ tơdah hơ-ưi gơnam tam amra ngă hŭi rơhyưt brơi ană mơnuih. Ană mơnuih lĕ yôm hloh, ƀing čơđai dưi ba rai pơ anai rơnuk rơnua lĕ mơ-ak mơ-ak biă mă yơh. Ră anai tơlơi rơkâo prong hloh lĕ djru mă mơnuih”.

Kơ-iăng Khua dêh čar hơmâo kĭ tơlơi pơtrun djru brơi ječ hơdôm rơbâo klai prăk brơi 4 boh tơring čar Khánh Hòa, Lâm Đồng, Gia Lai hăng Dak Lak. Ding jum ling tơhan hơmâo pơkiăo nao giăm 45 rơbâo čô mơnuih apăn bruă, ling tơhan hrŏm hăng hơdôm rơbâo gơnam măi mok; pơdŭ pơgiăng, jao brơi hơdôm rơtuh tơ̆n gơnam, ba nao rơdêh bek pơdŭ pơgiăng gơnam plĕ trun djru brơi mơnuih ƀôn sang kual ia ling dăo. Anom bruă kông ang hơmâo ba nao hơdôm rơtuh rơkâo čô mơnuih apăn bruă, tơhan kông ang wai pơgang rơnuk rơnua, hơđong amăng ƀon lan, hrŏm hăng gơnam măi mok pok pơhai bruă djru brơi, rŭ pơdong glăi anŏ răm rai yua hơjan ia ling dăo. Ding jum ngă hmua hăng ayuh hyiăng lŏn mơnai hơmâo pơtrut pơsur djop khul grup jar kmar djru brơi mơnong ƀong huă, ia tơsâo hăng ia mơñum amăng get djru brơi mơnuih ƀôn sang kual ia ling dăo ƀơi hơdôm boh tơring čar Gia Lai hăng Dak Lak; laih dong djru brơi 1.500 kơthung mitôm brơi Dak Lak. Ding jum prăk kak djru brơi 4.000 tơ̆n braih brơi hơdôm boh tơring čar Gia Lai, Khánh Hòa. Ding jum ia jrao hơmâo kah mă yua 6 tơ̆n ia jrao pơgang hăng 150.000 asar jrao ngă hơdjă ia yua; 3.000 adung jrao brơi sang anŏ glăk kiăng amăng kual ia ling dăo./.