Khua ding jum pơphô bruă Ping gah yă Phạm Thị Thanh Trà brơi thâo, lơ 14/3, Ding jum kơđi čar jơnum tŭ ư hrŏm hăng hơdră bruă dưm dăp glăi anih anom mă bruă djop gưl hăng pơjing hơbô̆ bruă gong gah ƀon lan 2 gưl, amăng anun hơmâo bruă pơmut hrŏm sa, dua boh tơring čar, lui hĭ gưl tơring glông, pơmut lu să. Tơdơi anun, Ping gah Kơnuk kơna amra mơ-it nao akŏ bruă kiăng mă tơlơi pơgôp hiăp mơng djop ƀon lan hăng mơ-it nao djop ding jum, gơnong bruă kiăng pơgôp hiăp.

Him lăng amăng tong krah blan 4/2024, Khul git gai amra lăi pơthâo Khul apăn bruă Ping gah. Lăi nao kơ bruă dưm dăp glăi anih anom mă bruă gưl să, Khua ding jum pơphô bruă Ping gah lăi rơđah, ră anai gưl să hơmâo 10.035 anih anom, him lăng amra dưm dăp glăi dŏ kơnong giăm 2.000-“arăng kar hăng sa boh tơring glông anet”. Bruă anai lĕ tơlơi glăm ba mơng Jơnum min apăn bruă Khua pơ ala mơnuih ƀôn sang dêh čar, amra ngă mơtăm tơdơi kơ Jơnum Khul apăn bruă gơnong glông. Tơdơi kơ phiah phiăn čih pơkra, pơhrua tơlơi phiăn dưm dăp gong gai ƀon lan hrŏm hăng hơdôm tơlơi phiăn bơdjơ̆ nao, Khua ding jum brơi thâo amra pơđut hĭ bruă mă mơng gong gai gưl tơring glông.