Mơguah lơ 13/3, Khua git gai pơ ala mơnuih ƀôn sang ơi Trần Thanh Mẫn, Khua grup pel ĕp mrô 1910 mơ̆ng Ding jum kơđi čar ngă bruă hăng khua mua tơring čar Bình Định lăi pơthâo hră pel ĕp bruă hăng Khul khua apăn bruă Ping gah tơring čar kơ bruă dưm dăp ngă hơbôt anom bruă kơnuk kơna; bruă prăp rơmet Jơnum ruah khua ping gah djŏp gưl tal 14; kơčăo bruă pơhrua kơ pơđĭ kyar bơwih ƀong huă - mơnuih mơnam thun 2025 kiăng hơmâo rơnoh đĭ kyar 8% truh kơ lu hloh...

Tơdơi kơ hmư̆ tơlơi lăi pơthâo bruă pel ĕp hăng Khul khua apăn bruă Ping gah tơring čar Bình Định, hơdôm tơlơi pơgôp hiăp mơ̆ng grup khua pel ĕp, mơ̆ng khua mua tơring čar Bình Định, pơhiăp pơtum glăi blung a amăng mông ngă bruă, Khua git gai pơ ala mơnuih ƀôn sang dêh čar ơi Trần Thanh Mẫn brơi thâo, grup pel ĕp hơmâo hmư̆ djŏp tơlơi rơkâo đĭ či ngă pơgiong Hră lăi pơthâo glăi. Hăng rơnoh đĭ kyar 8%, Khua git gai pơ ala mơnuih ƀôn sang dêh čar bơni hăng kơnang tơring čar Bình Định gir run amra dưi ngă hăng ngă rơgao rơnoh pơkă. Khua git gai pơ ala mơnuih ƀôn sang pơtă hlâo, Bình Định kiăng kiăo tui djơ̆ hăng tơlơi pơtrun mơ̆ng Ping gah, tơlơi phiăn mơ̆ng Kơnuk kơna amăng bruă dăp glăi anom bruă kơnuk kơna, ngă klă tơlơi pơčrâo trun mrô 35, tơdah ngă ƀu rơhuaih, rơkâo tơlơi pơgôp hiăp mơ̆ng anom apăn bruă; laih dong lăi pơthâo glăi hăng Ding jum bruă čar đah mơ̆ng thâo pơphun ngă; bruă git gai bơwih ƀong - mơnuih mơnam khŏm kiăo tui tơlơi pơplih ƀơi rŏng lŏn tơnah ăt kah hăng amăng lŏn ia kiăng djơ̆ hăng tơlơi hơmâo sit nik./.