Amăng tal nao čuă sit nik dêh čar Singapore, mơguah lơ 13/3, Khua git gai Ping gah dêh čar ơi Tô Lâm hrŏm hăng khua mua mơ̆ng dêh čar Việt Nam hơmâo nao čuă hăng mă bruă ƀơi tơdrun tum păn Pansir Panjang - sa amăng hơdô tơdrun jưh rơdêh container phrâo hloh klă hloh ƀơi kual Ngŏ Dơnung ASIA, kiăng hơduah ĕp lăng hơbô̆ bruă pơkra anih anom ƀơi tơdrun ia mơ̆ng Singapore. Ƀơi tơdrun Pansir Panjang, Khua git gai Ping gah ơi Tô Lâm hăng grup khua mua hơmâo Nelson Quek, Khua git gai bruă kual Ngŏ Dơnung ASIA hăng khua mua mơ̆ng Grup mơdrô PSA Singapore pơƀuh brơi bruă đĭ kyar, hơdôm tơlơi pơplih hmư̆ hing, hơdră đĭ kyar pơ anăp anai mơ̆ng tơdrun tum păn.

Khua git gai Ping gah ơi Tô Lâm bơni hơ-ơč hơdôm tơlơi hơmâo ngă mơ̆ng tơdrun ia, laih anun brơi thâo Việt Nam hơmâo mrô blơi sĭ gơnam hăng čar rơngiao năng ai 800 klai dolar Mi thun 2024 laih anun anăp kiăng hơmâo 1.000 klai dolar Mi, yua hnun jơlan ia rơsĭ pơgiăng gơnam hăng tơdrun ia rơsĭ yôm biă mă amăng bruă pơhlôm rơnoh sĭ mơdrô kiăng hơmâo mơ̆ng Việt Nam. Mơ̆ng anun, Khua git gai Ping gah čang rơmang PSA tañ hơmâo ƀơi Việt Nam đah mơ̆ng ngă hrŏm đĭ kyar măi mok anih anom tơdrun tum păn ƀơi Việt Nam yua dah tơlơi rơgơi mơ̆ng Singapore amăng bruă anai yôm biă mă hăng Việt Nam amăng mông glăk pơplih phrâo tơdrun tum păn hăng đĭ kyar bruă logistic.