Khua git gai Ping gah dêh čar hok mơ-ak, lăng yôm tơlơi pơgôp sit nik hăng tŭ yua mơng grup PE kah hăng ơi Nate Franklin hăng bruă pơđĭ kyar mơng Việt Nam amăng bruă apui lơtrik pơkra glăi hăng tơlơi rô nao rai Việt Nam-Mi. Khua git gai Ping gah pơsit tong dêh čar Mi lĕ sa amăng hơdôm boh dêh čar ngă hrŏm bơwih ƀong huă yôm phăn hăng Việt Nam, amăng bruă rô nao rai ngă hrŏm yôm phăn djop mơta Việt Nam-Mi jing tơlơi gal hăng tơlơi dưi prong brơi anom bơwih ƀong dêh čar Mi tuh pơ alin, bơwih ƀong huă ƀơi Việt Nam.

Khua git gai Ping gah dêh čar lăi nao tơlơi yak nao, tơlơi gir run mơng Ping gah, Kơnuk kơna hăng mơnuih ƀôn sang Việt Nam kiăng ngă tui hơnong pơkă pơđĭ kyar, jing dêh čar glăk pơđĭ kyar, tuh tia pơkra ming pơplih phrâo, pơhrui rĭm akŏ mơnuih lu amăng thun 2030, hăng jing dêh čar pơđĭ kyar, pơhrui lu amăng thun 20245; lăi pơtong Ping gah hăng Kơnuk kơna Việt Nam amra tŏ tui ngă gêh gal, amăng anun hơmâo pơplih pơkra hơdră bruă, kiăng hơdôm anom bruă tuh pơ alin amăng lŏn ia hăng tač rơngiao bơwih ƀong tŭ yua ƀơi Việt Nam. Dêh čar Việt Nam amra tŏ tui tơlơi ƀuăn hăng hơnong pơkă ngă hrŏ ƀiă asăp hơƀak dŏ “0” amăng thun 2050. Khua git gai Ping gah rơkâo grup PE tŏ tui pok prong ngă hrŏm, tuh pơ alin bơwih ƀong ƀơi Việt Nam, amăng anun hơmâo lu akŏ bruă pơplih yua apui lơtrik phrâo….