Klâo thun rơgao, djop anom bruă, khua mua ping gah, sang bruă tơhan kông an djop gưl amăng dêh čar thâo hluh tong ten, thâo tum kơ boh yôm, anŏ klă, anŏ kiăng biă mă kơ bruă hrăm hăng hla tui tơlơi pơmin, pran jua, tơlơi dŏ dong ƀong huă mơ̆ng Hồ Chí Minh hăng năm mơta tơlơi Wa Hồ pơtô lăi amăng bruă akŏ pơdong ping gah, bruă mă tơhan kông an mơnuih ƀôn sang.

Pơhiăp klah čun ƀơi mông jơnum, Khua tơhan krên dên ơi Tô Lâm-Khua ding jum rơkâo, djop gưl anom bruă ping gah, khua mua tơhan kông an djop gưl ăt ngă tui klă hloh hơdôm wơ̆t hrăm gah bruă kơđi čar, pơčrong sai hla tui tơlơi pơmin, pran jua, tơlơi dŏ dong ƀong huă mơ̆ng Hồ Chí Minh laih anun Năm mơta tơlơi Wa pơtô; pơčrâo ba tong ten, ngă tui tŭ yua tui hăng tơlơi git gai mơ̆ng ơi Nguyễn Phú Trọng, Khua git gai ping gah dêh čar kơ klâo mơta bruă phun anun lĕ "Hrăm tui" , “Ngă tui khut khăt” laih anun "ba gru nao hlâo" amăng bruă hrăm hăng hla tui Năm mơta tơlơi Wa Hồ pơtô laih anun akŏ pơdong, ƀư̆ pơkra Ping gah tui hăng pran jua sơ̆n, ngă tui na nao, kjăp hơđong, djop mông, djop anih, djop bruă mă gêh găl hăng ƀu gêh găl.