Ƀơi mông jơnum, tŭ tơlơi jao mơ̆ng khua Ding jum kông an brơi pơđĭ bruă, khua anom pơphun bruă mă pơđĭ bruă ngă khua mơ̆ng Ding jum kông an jao bruă pơblih ngă khua hăng pơđĭ Đại tá Nguyễn Thanh Liêm plơi pla Hà Tĩnh, Kơ-iăng Khua kông an tơring čar Hà Tĩnh nao tŭ mă bruă ngă khua kông an tơring čar Dak Nông.

Tŭ mă bruă jao phrâo, amăng anih phrâo mơ̆n, Đại tá Nguyễn Thanh Liêm, Khua kông an tơring čar Dak Nông ƀuăn amra tañ dăp glăi ngă hơđong bruă mă, hơduah ĕp lăng tơlơi pơhing amăng bruă mă, amăng tơring čar; pơđĭ tui kơtang bruă glăm ba, pơyơr pran jua tơlơi thâo, ia rơgơi djru hrŏm anom bruă ping gah, khua mua kông an tơring čar Dak Nông laih anun abih bang ƀing tơhan kông an amăng tơring čar ngă giong bruă jao, pơgang tơlơi rơnuk rơnua, akŏ pơdong bruă mă tơhan kông an Dak Nông mă bruă tơpă, rơgoh, kjăp đơr hơr.