Tui bruă jao mơng Ding jum kông ang, mơguah lơ 20/9, Đại tá Vũ Hồng Quang, Khua anom bruă kông ang tơring čar Cao Bằng hơmâo jao 2 klai prăk mơng keh prăk djru khăp pap ƀing gŏp kông ang mơnuih ƀôn sang, kiăng kơ djru brơi mơnuih ƀôn sang bơdjơ̆ nao mơng kơthel mrô 3 ngă amăng tơring čar. Anai lĕ pran khăp pap mơng ƀing apăn bruă, tơhan kông ang mơ-it nao mơnuih ƀôn sang kual răm rai yua hơjan kơthel, kiăng pơ alum pran jua mơnuih ƀôn sang glăk bưp tơnap tap, tañ hơđong tơlơi hơdip mơda.

Pơ ala brơi Ding jum kông ang, Đại tá Vũ Hồng Quang čang rơmang hăng tơlơi gơgrong hrŏm, Jơnum min djop djuai ania mơnuih mơnam Việt Nam tơring čar Cao Bằng amra kah pha djru tơl mơnuih bưp tơnap tap, pơhlôm tong ten, tơpă sit. Truh ră âni, Jơnum min djop djuai ania mơnuih mơnam Việt Nam tơring čar Cao Bằng hơmâo tŭ mă prăk djru amăng lŏn ia hăng tač rơngiao rơbêh 134 klai prăk, rơbêh 115 tơ̆n braih hăng giăm 300 tơ̆n gơnam yua pơkŏn.