Mơguah lơ 5/5, ƀơi tơring čar Tây Ninh, Ping gah khul tơhan, Ding jum ling tơhan pơphun ngă lơphet brơi Rup trah Hồ Chí Minh hăng brơi Hră bơni mơ̆ng Khua ding jum Ling tơhan kơ hơdôm khul grup, mơnuih mă bruă rơgơi amăng hrơi ruah khua pơ ala mơnuih ƀôn sang dêh čar tal 16 hăng khua mua pơ ala mơnuih ƀôn sang djŏp gưl rơwang thun 2026-2031. Nao pơhmư̆ hăng pơhiăp ƀơi mông jơnum, Đại tướng Nguyễn Trọng Nghĩa, Ding kơna Ding jum kơđi čar, Khua anom bruă phun kơđi čar khul tơhan Việt Nam lăi dlăm, bruă brơi rup trah Wa Hồ jing yom biă mă amăng kơđi čar, tơlơi pơmin, laih anun hơdor tơngia kơtang biă, bơhơdor brơi ƀing khua, mơnuih ping gah gir kơtir na nao, ƀu pơdơi pơdă hrăm hăng hla tui Wa Hồ.

Đại tướng bơni biă kơ tơlơi đăo kơnang mơ̆ng mơnuih ƀôn sang lơ̆m hơmâo ruah ngă ding kơna khua pơ ala mơnuih ƀôn sang dêh čar tal 16, laih dong pơsit amra gir hloh, bong kjăp pran jua kơđi čar, jê̆ giăm mơnuih ƀôn sang, pơhmư̆ tơlơi pơgôp hiăp mơ̆ng mơnuih ƀôn sang. Ñu ăt kiăng tơring čar Tây Ninh hrăm hăng hla tui Wa, akŏ pơjing khul mơnuih ngă khua kjăp tơlơi pơmin, rơgơi mơbruă, pơtrut gum pơgôp tơhan - mơnuih ƀôn sang, djru bong kjăp laih anun đĭ kyar abih bang hlom bom tơring čar./.