VOV4.Jarai - Him lăng mrô đĭ kyar GDP tơnap biă, biă ñu amăng 3 blan tal 4, lơ̆m ƀơi rŏng lŏn tơnah hơmâo lu tơlơi rung răng. Ƀơi anăp tơlơi anai, Ding jum man pơphô hăng tuh pơ alin ăt ba tơbiă dua bơnah tơlơi dưi hơmâo: Tơdah đĭ kyar aset yua tơnap tap lĕ amăng thun 2022, đĭ kyar GDP dưi hơmâo 7,5%. Bơ tơdah amăng hrơi mông tui ră anai, huăi hơmâo tơlơi pơplih pơgăn bruă bơwih ƀong amăng dêh čar ta lĕ GDP amra hơmâo năng ai 8%. Kơ tơlơi dưi đĭ kyar bơwih ƀong huă dêh čar Việt Nam thun 2023, Ding jum man pơphô hăng tuh pơ alin pơsit hrơi mông anai ăt hơmâo lu tơlơi rung răng, tơlơi gêh gal wơ̆t hăng tơnap tap, samơ̆ tơnap lu hloh. Bruă nua gơnam đĭ ngă prăk trun nua, hăng pơđĭ kyar bơwih ƀong ƀơi rŏng lŏn tơnah thun 2023 tơnap thâo hlâo biă, Việt Nam kiăng hơmâo hơdră wai lăng klă kah mơng đĭ kyar hơđong, tơdah ƀu wai lăng klă lĕ ƀu thâo lăi hlâo ôh tơlơi tơnap tap pơ anăp. Lăi nao bruă brơi prăk ngă bruă kơnuk kơna jao, Kơ-iăng khua ding jum man pơphô hăng tuh pơ alin brơi thâo, hơmâo 46,7% pơhmu hăng akŏ bruă Khua dêh čar jao. Mah aset hloh hăng thun hlâo, samơ̆ mrô pơkă đut tơhnal lu hloh kơ thun hlâo giăm 35.000 klai prăk. Phun ñu lĕ yua prăk pioh tuh pơ alin bruă kơnuk kơna thun 2022 lu hloh kơ 2021.

Siu H’Mai: Pơblang