Khua ding jum wai lăng jơlan Nguyễn Văn Thắng hơmâo tơlơi pơgôp amăng hră pơ-ar kơ tơlơi ba truh, anŏ aka ƀu klă kah hăng ƀuăn hrŏm hăng tơring čar Gia Lai pơsir hĭ tơnap tap, gun găn kơ akŏ bruă pơkra ming jơlan mrô 19. Akŏ bruă kơtưn pơkuh nao rai jơlan glông ƀơi kual Dap kơdư (pơkra ming jơlan mrô 19) yua Khul wai lăng akŏ bruă 2, Ding jum wai lăng jơlan glông tuh pơ alin, hăng abih tih prăk tuh pơ alin rơbêh 3.600 klai prăk. Man pơkra mơng thun 2021 hăng him lăng amra pơgiong amăng blan 6/2023.

Samơ̆ yua hơdôm tơlơi gun găn lơm man pơkra, blan 7/2023, Khul Khua pơ ala mơnuih ƀôn sang tơring čar Gia Lai hơmâo hră pơ-ar pơƀut glăi tơlơi pơgôp hiăp mơng mơnuih ƀon sang mơ-it nao Kơnuk kơna. Amăng anun lăi rơđah “Akŏ bruă pơkra ming, pok prong jơlan mrô 19” ară jơlan găn nao tơring glông Mang Yang hăng să Bình Giáo tơring glông Chư Prông, tơring čar Gia Lai, man pơkra sui đơi, bơdjơ̆ nao tơlơi hơdip kơ mơnuih ƀon sang, ngă tơnap nao rai. Rơkâo Ding jum wai lăng jơlan đing nao git gai Khul wai lăng akŏ bruă 2 hăng hơdôm anom bruă bơdjơ̆ nao pel ĕp hăng pơsir hĭ hơdôm anŏ aka ƀu klă lơm man pơkra.