Grup hyu mă bruă mơng ƀôn prong Hải Phòng hơmâo nao tơl kual ia ling ƀơi Dak Lak hăng thâo rơđah tơlơi sit nik kiăng prap lui akŏ bruă hơmâo djru brơi sit nik brơi neh met wa amăng kual ia ling dăo. Ƀôn prong Hải Phòng amra pơkiăo nao 500 čô nai ia jrao, ơi ia jrao nao pơ Dak Lak kiăng djru brơi hơdôm bruă gah ia jrao tơdơi kơ ia ling dăo. Kơ-iăng Khua Jơnum min mơnuih ƀôn sang ƀôn prong Hải Phòng hơmâo jao pơhrua dong prăk djru 40 klai prăk, đĭ tui mrô prăk ƀôn prong djru brơi Dak Lak  amăng tal hơjan ia ling dăo anai đĭ 50 klai prăk. Hrŏm hăng anun, Hải Phòng djru brơi gơnam  tam, ia jrao, ia mơñum…djru brơi bruă pơgang klin kman tơdơi kơ hơjan ia ling dăo nua ñu rơbêh 2 klai prăk. Hlâo anun, ƀôn prong hơmâo pơkiăo nao grup hơmâo 21 mơnuih thâo rơgơi amăng bruă pơgang klin kman…nao djru brơi Dak Lak. Ơi Nguyễn Minh Hùng pơsit tong, ƀôn prong Hải Phòng amra djru brơi Dak Lak.

“Tơdơi kơ hơmâo tơlơi klah čun mơng Ding jum kơđi čar, Khul git gai Ping gah, ƀôn prong Hải Phòng hơmâo laih hơdră djru brơi tơring čar Dak Lak. Tơdơi kơ hơjan kơthel, sa bruă yôm hloh lĕ wai pơgang jum dar hăng pơgang klin kman. Ƀing ta hơmâo akŏ bruă tong ten amăng bruă prap lui gơnam gah ia jrao, mơnuih djru brơi. Ƀing gơmơi hơmâo prap lui hăng amra prap pơkiăo nao dong mơng 300-500 čô nai ia jrao, ơi ia jrao hrŏm hăng Dak Lak pok pơhai bruă pơgang klin kman kah hăng pơjrao brơi mơnuih duam ruă”.

Ƀôn prong Hồ Chí Minh pơtum pơƀut lu gơnam, mơnuih djru brơi Khánh Hòa tơdơi kơ hơjan ia ling dăo, mơng bruă khăm pơjrao-ƀơk jrao, djru mơnong ƀong huă, rơmet pơagaih jum dar truh pơ bruă pơkra ming sang hră, sang ia jrao hăng brơi anih tơnă hơbai mơnuih ƀôn soh sel brơi mơnuih ƀôn sang kual ia ling dăo. Grup hyu mă bruă hơmâo nao tơl anih ia dăo dơlăm ƀơi Nha Trang, Diên Khánh, Khánh Vĩnh. Ơi ia jrao Phạm Minh Công, Khul ơi ia jrao hlăk ai ƀôn prong Hồ Chí Minh brơi thâo, ƀing nai ia jrao amăng grup hơmâo tŭ mă tơlơi črâo ba hăng pok pơhai ngă tui ječ, samơ̆ ăt prap lui djop mơta brơi kơ bruă khăm pơjrao brơi mơnuih duam ruă ƀơi kual ia ling dăo:

“Amăng hơdôm hrơi đôč, ƀing gơmơi amra prap lui, pơtum pơƀut mơnuih nao djru brơi amăng mơmŏt mlăm. Čang rơmang amra djru brơi ha bơnah tơlơi tơnap tap kơ mơnuih ƀôn sang. Ăt anai lĕ pơtrut pơsur brơi mơnuih ƀôn sang kual ia ling dăo găn rơgao tơnap tap”.

Hrŏm hăng anun, ling tơhan hơmâo pok anih tơnă hơbai gah rơngiao, djru brơi mơng 10.000-12.000 anung gơnam ƀong ha hrơi kiăng djru brơi mơnuih ƀôn sang hơdôm boh să, phường răm rai kơtang hăng ƀing tơhan nao djru brơi. Sang sĭ mơdrô gơnam Co.opmart-Khul pơlir bơwih ƀong hrŏm sĭ mơdrô ƀôn prong Hồ Chí Minh ƀơi Nha Trang hơmâo ječ ameč ba pơmut gơnam, pơhlôm huăi đĭ nua, anăm brơi kơƀah gơnam amăng hrơi mông tơnap tap. Ơi Nguyễn Phước Lộc, kơ-iăng Khua git gai Ping gah ƀôn prong Hồ Chí Minh, pơsit tong, ƀôn prong amra tŏ tui djru brơi Khánh Hòa lăp djơ̆, hluai tui tơlơi sit nik; laih dong kơtưn ba nao mơnuih gum hrŏm pơkra ming anih anom, jơlan glông:

“Hơdôm anom bruă pel ĕp, djru pơkra ming djop sang hră hăng sang ia jrao răm rai, pơhlôm brơi ƀing čơđai tan pơwot glăi nao sang hră hăng sang ia jrao pơwot glăi mă bruă tui hơđăp”.

Ngă tui tơlơi iâu pơthưr mơng Jơnum min djop djuai ania mơnuih mơnam Việt Nam tơring čar Dak Lak, amăng hơdôm hrơi rơgao, lu anom bruă, khul grup hrŏm hăng hơdôm rơbâo čô mơnuih ƀôn sang kual yŭ tơring čar hơmâo pơgôp hơdôm rơtuh tơ̆n mơnong ƀong huă, ia mơñum, sum ao….mơ-it djru neh met wa kual ia ling dăo gah Ngŏ. Ơi Y Giang Gry Niê Knơng, kơ-iăng Khua git gai Ping gah-Jơnum min djop djuai ania mơnuih mơnam Việt Nam tơring čar Dak Lak brơi thâo, bruă tŭ mă hăng kah pơpha djru brơi glăk pok pơhai ječ ameč.

“Hăng pran gum tơngan hrŏm mơng neh met wa amăng lăm hăng gah rơngiao tơring čar, jak iâu djop plơi pla, hơdôm sang jơnum tơnă hơbai, anung gơnam ƀong huă, anung ƀañ tek…Kiăng pơdŭ pơgiăng nao hmao tlôn brơi kơ neh met wa kual ia ling dăo, kual ia guang dar. Hrŏm hăng anun, ƀing gơmơi ăt tŏ tui iâu pơthưr, tŭ mă wŏt prăk kak hăng mơnong ƀong huă, gơnam tam djru brơi neh met wa hơđong tơlơi hơdip mơda”./.