Jơnum min djŏp djuai ania mơnuih mơnam Việt Nam ƀôn prong Hồ Chí Minh brơi thâo, bruă iâu pơthưr hăng tŭ mă gơnam djru kơ neh met wa hơdôm boh tơring kual Tong Krah bưp tơlơi truh hơjan kơthel ia dăo, hơmâo lu biă mơnuih djru. Khul iâu pơthưr gum djru mơ̆ng ƀôn prong hơmâo tŭ mă rơbêh 32.400 wơ̆t pơčruh, hăng prăk abih tih ñu 245 klai prăk. Hrŏm hăng anun lĕ năng ai 30.000 kơdung pioh ia jrao, 70 tơn braih hăng giăm 1.400 tơn gơnam yua pơkŏn dong hơmâo nua rơbêh 140 klai prăk. Ƀôn prong Hồ Chí Minh ăt iâu pơthưr rơdêh, măi mok, mơnuih djru ba Khánh Hòa ming pơkra tơlơi truh lŏn adai ngă, amăng anun brơi 50 klai djru ječ ameč, djru pơkra ming 23 boh sang hră răm rai, tơglưh, hăng pơkiăo nao 650 čô mơnuih nao djru kih rơmet ƀơi hơdôm anih răm rai kơtang.

Lơ 24/11, Khua tơhan sơlup kual 4 ăt brơi nao 1000 čô khua mua, ling tơhan hrŏm hăng lu rơdêh đĭ, gơnam yua mă bruă nao pơ kual hlăk bơbeč djơ̆ kơtang yua ia ling dăo ƀơi tơring čar Khánh Hòa hăng Dak Lak. Ƀing tơhan sơlup pơpha hyu lu khul grup nao djru kih rơmet anih hơdip jum dar, jơlan glông truh hơdôm hơpluh km; djru ngă rơgoh ia yua, duñ rơmet djah djâo ƀơi 12 boh sang hră, 3 boh sang bruă Jơnum min mơnuih ƀôn sang, 1 boh sang ia jrao hăng giăm 100 boh sang mơnuih ƀôn sang ƀơi Đông Hòa, Tuy Hòa, Bình Kiến, Bắc Nha Trang hăng să Diên Điền. Hrŏm hăng anun, djop sang bruă amăng kual ăt pơgiăng nao giăm 100 met khô̆i ia mơñum, 5000 kơthung mi tôm hăng lu mơta mơnong ƀong huă pơkŏn wơ̆t braih, ia tơsâo rơmô, sum ao, abăn khăn. Khua tơhan sơlup kual 4 brơi thâo, rơnoh bruă mă ăt dŏ lu laih anun ƀing tơhan sơlup ăt khom nao djru ba kơ djop plơi pla hơdôm hrơi pơ anăp.

Ƀơi Lâm Đồng, hơjan ia dăo hơdôm hrơi rơgao ngă dlut, tơhlŏm kơtang biă, ngă jơlan răm rai, rơdêh dŏ kơđông ƀu thâo nao rai. Ding jum man pơdong ngă hrŏm hăng tơring čar iâu pơthưr mơnuih, rơdêh măi mok kuăi kor pơđuăi pơtâo čuah, pơkra glăi taluy, bruăi pơđoh brơi ia thâo rô, laih anun krăo lăng ayuh hyiăng đah mơ̆ng pơhlom rơnuk rơnua kơ mơnuih ƀôn sang. Kơ-iăng khua Ding jum man pơdong Lê Anh Tuấn brơi thâo, anom bruă glăk ječ ameč ming pơkra anih anom đah mơ̆ng tañ thâo ba nao gơnam hăng hơđong bruă pơkra gơnam sĭ mơdrô. Kơnong ƀơi Jolwan prong 20 čư̆ čun čoe Mimosa, mơnuih ngă bruă kiăng amăng 10 hrơi khŏm rơmet rơmot, pok jơlan jăng jai brơi rơdêh nao rai, hăng ngă giong abih bang amăng 1 blan. Lâm Đồng ăt kiăng hơdôm boh tơring prăp rơmet pơgang, lăng glăi anih hŭi rơhyưt kơtang đah mơ̆ng ba pơđuăi ană plơi lơ̆m kiăng.