Lăng yom bruă prăp lui hlâo mơ̆ng tơring čar Khánh Hòa hơmâo pơtum đut tơhnal ƀing ling tơhan, amăng anun hơmâo khua mua tơhan kual 4 gah tơhan sơlup, ba kanô mă bruă hrơi mlam, pơgiăng hơdôm rơtuh čô mơnuih ƀôn sang tơbiă đuăi mơ̆ng anih hŭi rơhyưt. Ƀing tơhan blah ngă, kông an hăng ƀing tơhan beč bal amăng ia ăt djru ba djop să ia lip ƀu dưi tơbiă hyu. Mah ia ƀơi sa dua bit anih hlăk hrŏ tui, samơ̆ tơlơi pơhing ia lip ăt tơnap tap đôč, hơjan aka ƀu ưt, lu jơlan glông ia lip kơtang, lŏn tơhlŏm. Kơ-iăng khua dêh čar rơkâo mơnuih ƀôn sang ăt khom dŏ glăi amăng anih nao kơđap rơnuk rơnua, ƀu dưi pơwơ̆t glăi pơ sang ôh, lơ̆m aka ƀu hơmâo tơlơi lăi pơthâo mơ̆ng gong gai kơnuk kơna.

Truh tlam mơmot lơ 21/11, hơjan gah ngŏ-Dơnung Tong Krah hăng Dap Kơdư tơdu ƀiă laih. Anih hơmâo jơlan prong hloh, ia đĭ truh 350mm, hrŏ trun ha mơkrah laih pơkă hăng ia hơjan kơtang hloh amăng lơ 19/11. Drai ia apui lơtrik Ia krông Ba Hạ ăt pơđoh ia aset tui laih, hăng ia ƀơi ia krông pơ Gia Lai, Dak Lăk trun tui laih. Jơlan prong 29 tô mơ̆ng Yŭ nao pơ Ngŏ Dak Lăk dưi nao rai, lu grup djă ba rơdêh, ca nô, song măi, gơnam ƀong huă, ia jrao trun nao djru kơ neh met wa gah Ngŏ. Rơnoh pơhŭi tơlơi truh lŏn adai ngă mơ̆ng mrô 3 hrơi anai, jing trun jing mrô 1 amăng 2 hrơi pơ anăp. Ƀơi Lâm Đồng, anih hơmâo hơjan ia dăo kơtang huăi hơmâo ƀơi đơr hơr ôh, samơ̆ pơƀut kơtang ƀơi hơdôm boh să D’Dral, Đơn Dương ...dơnung Drai ia apui lơtrik Đa Nhim, ăt rơgao laih tơlơi pơhŭi kơtang. 1500 čô mơnuih hơmâo ba nao dŏ pơ anih rơnuk rơnua laih. Tơdơi kơ ia trun, mơnuih ƀôn sang hăng gong gai glăk pơƀut pơsir, ming pơkra tơlơi răm rai. Bruă djru mơnuih pơ kual ia dăo gah ngŏ- Dơnung Tong Krah hăng Dap Kơdư ăt ngă ječ hăng hơmâo lu tơlơi tơnap mơn.

Ƀơi Lâm Đồng, yua ia pok pơhai mơ̆ng bơnư̆ drai apui lơtrik gah kông ty apui lơtrik Dă Ñim-Hàm Thuận-Dă Mi blai hang ƀơi Đơn Dương, ia lơ̆i kơtang amăng mlam lơ 19/11, hơmâo mông đĭ kơtang hloh truh 2.580 met khô̆i lơ sa tơnit (giây), ƀơi hơdôm boh să gah tơkai ia Dă ñim amăng anun hơmâo să Dran ia lip abih kah hăng ia rơsĭ. Tơring čar khom iâu pơtum lu tơhan, ba rơdêh pơgiăng đuăi mơnuih ƀôn sang rơbêh 1.500 čô ƀơi să Dran nao pơ anih rơnuk rơnua. 

Tui hăng tơlơi jŭ yap blung a, hơmâo giăm 750 boh sang ia dăo, răm kơtang; 5 boh sang dlưh; năng ai 1.320 ha đang añăm pơtam răm rai. Hơjan hlim prong dŏ ngă lu anih lŏn tơhlom pơčah, tơhroh trun gôm hĭ jơlan nao rai amăng tơring čar. Rơngiao kơ anih lŏn tơhlom ƀơi jơlan čun čue Mimosa jơlan 20 ngă čơđang pơčah tơ̆i jơlan, lu jơlan nao pơ plơi pla ăt răm rai kơtang mơ̆n. Jơlan mơ̆ng să Đan phượng nao pơ să Tân Thanh ră anai gah să Tân Hà-Lâm Hà lŏn tơhroh, kơđông jơlan. Khua mua jơnum min mơnuih ƀôn sang tơring čar Lâm Đồng pơtrun hiăp djop să hăng ƀing tơhan kơnuk kơna ăt pơdŭ đuăi mơnuih ƀôn sang mơ̆ng anih dŏ hŭi rơhyưt, nao dŏ pơ anih rơnuk rơnua hloh, pơhlom djop mơnong ƀong huă, ia mơñum, abăn khăn mơsum hăng gơnam kiăng yua sit nik.