Hrŏm hăng hơdră pơgang hơjan kơthel ia ling dăo ngă kơ hơdôm glông jơlan, dơnao kŏng ia pơ kual Dơnung Tong Krah - Dap Kơdư ăt prăp lui “4 ƀơi anih”, prăp rơmet ba pơđuăi mơnuih ƀôn sang tañ, anăm sư̆ rơbư̆, ƀu thâo hlâo. Tui hăng hơdră pơgang kơthel tal 13, hơdôm boh tơring kual Dơnung Tong Krah - Dap Kơdư iâu glăi ƀat tô mă akan pơ ia rơsĭ nao kơđap kơthel laih; pok pơđoh ia hơdôm klăk met khô̆i ƀơi hơdôm dơnao ia apui lơtrik. Hơdôm boh tơring ba pơđuăi mơnuih ƀôn sang nao kơđap pơ anih hơđong, khŏm ngă giong hlâo kơ 5 mông tlam lơ 6/11.

Ƀơi anăp kơ tơlơi tơnap tap mơng kơthel Kalmaegi, Jơnum min mơnuih ƀôn sang tơring čar Lâm Đồng ba tơbiă hră pơ-ar git gai ječ, rơkâo djop gơnong bruă, sang bruă, gong gai ƀon lan hăng anom bruă bơdjơ̆ nao gơgrong pok pơhai hơdră pơgang, pơgăn hăng pơhlôm hlâo hơjan kơthel, ia ling dăo tơdơi kơthel pưh nao. Khua Jơnum min mơnuih ƀôn sang tơring čar Lâm Đồng rơkâo djop ƀon lan, kual Phú Quý kiăo tui lăng na nao ayuh hyiăng, lăi pơthâo hmao tlôn brơi mơnuih ƀôn sang, anăm pơtah hơtai, ngă amưng. Laih dong, pel ĕp glăi hơdôm kual mơnuih ƀôn sang dŏ hơdip ter hang ia krông, čroh hnoh, kual dơnung, kual amuñ ƀuh lŏn tơhroh, prap lui bruă ba đuăi mơnuih ƀôn sang nao pơ anih rơnuk rơnua.

Kiăng pơgang hlâo kơthel 13 (Kalmaegi) glăk pưh nao giăm hang laih, hŭi biă mă, ƀing khua, ling tơhan pơgang guai tơring čar Gia Lai ngă hrŏm hăng gong gai djru mơnuih ƀôn sang khoă, pŏng kal, krap ming sang dŏ, ba pơđuăi gơnam pơ anih rơnuk rơnua; laih dong dŏ gak 24/24 kiăng hmao lăi pơthâo tañ djŏp tơlơi truh tơdah hơmâo. Ră anai abih bang tơhan pơgang guai ia rơsĭ tơring čar Gia Lai hơmâo 18 grup hăng 280 čô khua, ling tơhan hrŏm hăng 19 rơdêh ô tô, 185 boh rơdêh thut, 20 ƀat tô hăng sơlup hơmâo prăp lui djŏp gơnam djru mơnuih bưp tơlơi truh. Đại tá Trần Tiến Hải - Kơ-iăng khua git gai anom bruă tơhan, ngă rah khua git gai Anom git gai tơhan pơgang tơhan guai tơring čar Gia Lai brơi thâo: hơdôm puih kơđông, anih dŏ gak pơgang guai pơkiăo nao lu khua nao pơ anih amuñ hơmâo tơlơi truh, pôr pơthâo, iâu pơthưr neh met wa kơđiăng, ƀu dưi pơ-ai, ngă amưng ôh hăng kơthel anai. Hơdôm anom bruă khŏm pơhrêp kjăp anih dŏ, hơjai pioh gơnam, prăp lui anih kơđap kơthel kơ mơnuih ƀôn sang lơ̆m kiăng. Braih, gơnam ƀong huă, ia jrao hơmâo prăp lui djŏp laih.