Să Yang Mao, tơring čar Dak Lăk jing sa amăng hơdôm boh tơring bơbeč kơtang yua ia dăo. Tui hăng mrô jŭ yap blung a, tơdơi kơ hơjan prong tal anai, să Yang Mao hơmâo năng ai 80 boh sang ia dăo dlăm, amăng anun 2 boh sang tơglưh abih, 5 boh sang ia kuor pơđuăi. Lu glông jơlan amăng plơi pơčah, tơhlŏm, kơđông hĭ, ƀu thâo nao rai dong tah. Dua ƀĕ tơdrông ƀơi jơlan Ngŏ Trường Sơn răm rai, jơlan tơring čar 12 pơčah jing ƀu thâo nao djru ôh. Jơnum min mơnuih ƀôn sang să iâu pơthưr abih bang anom bruă, hơmâo kông an să, tơhan wai lăng plơi, hơdôm khul grup, pơƀut djru mơnuih ƀôn sang kih rơmet sang anŏ, ba nao pơ anih rơnuk rơnua. Laih dong, ngă hrŏm hăng anih man pơkra ječ ameč ming pơkra glăi jơlan ƀơi anih pơčah, tơhlŏm, đah mơ̆ng thâo ba nao gơnam djru kơ mơnuih ƀôn sang.

Hơdôm hrơi laih rơgao, hơjan prong sui hrơi ngă kơ ia mơ̆ng hlao rô trun hmar hăng kơtang anun lu anih ƀơi tơkai ia să Krông Bông, tơring čar Dak Lak, ia lip mlĕp, ƀu thâo truh nao rai. Amăng anun, plơi mrô 27, sa amăng hơdôm anih ia lip kơtang hloh. Tui hăng Jơnum min mơnuih ƀôn sang să Krông Bông, truh či tlam lơ 17/11, pă boh plơi thôn 27, 28, 29 hăng 39 hăng 500 boh sang anŏ ia lip ƀu thâo truh nao rai. Hrŏm hăng anun, lu anih lŏn tơhlŏm, dlưh prong. Khua mua gong gai kơnuk kơna jơnum ječ ameč khul pơhlom pơgang tơlơi truh lŏn adai ngă, khom mă bruă pơblih nao rai hrơi mlam, krăo hmư̆ tơlơi rơkâo mơ̆ng mơnuih ƀôn sang hăng dŏ mă bruă pơgăn ƀơi anih ia rô dơlăm akăn hrĕ pơgăn jơlan ƀu brơi nao rai hŭi ia kor. Hlă gai, hla bơnal pơthâo kiăng mơnuih ƀôn sang thâo, bĕ hĭ anih hŭi rơhyưt. Rơbêh 100 čô mơnuih mă bruă, tơhan kông an, tơhan plơi mă bruă wơ̆t amăng mlam, să đĭ kanô hăng song măi mơ̆ng sang bruă mơdrô djru kơ mơnuih ƀôn sang

Jơlan prong sui, lu boh tơring ƀơi tơring čar Khánh Hòa dăo dlăm, jơlan nao rai răm, pơčah hĭ. Jơlan čư̆ čun čoe Khánh Lê (Jơlan prong 27C) tơhlŏm kơtang biă, ngă lu mơnuih djai hăng rơka. Hơjan prong ngă kơ taluy Jơlan prong 27C tơglưh trun, lu pơtâo pơprong lê̆ trun pơ jơlan. Mơguah lơ 17/11, tơlơi truh tơhlŏm pơtâo kơtang, ngă kơ tơhan djru mơnuih mơnam ƀu thâo mut nao ôh. Anom apăn bruă iâu pơthưr hơdôm pluh boh rơdêh kuăi, kor lŏn pơtâo đah mơ̆ng dưi nao pơ anih tơhlŏm. Ƀơi Kơdư Nha Trang, hơdôm glông jơlan 23 Tháng 10, Nguyễn Khuyến, 2 Tháng 4....dăo dlăm; ter  hang ia krông Cái Nước ia blai đĭ jơlan. Ƀơi Cam Ranh hăng Cam Lâm, lu plơi pla ia dăo, hơmâo sang anŏ đa đĭ hăng pơbung sang tơguan arăng nao djru. Tơhan djru pơdong anih pơhŭi hlâo tơlơi truh, ba pơđuăi mơnuih ƀôn sang mơ̆ng anih plung, juăt hơmâo ia dăo kơtang.