Hrŏm hăng ba pơđuăi mơnuih ƀôn sang, phường Sông Cầu prăp rơmet anih dŏ kơđap, prăp lui braih huă añăm ƀong, ia mơñum, hơmâo ƀing ơi ia jrao; laih dong dŏ krăp lăng hrơi mlăm ƀơi anih ƀat tô song jưh hăng ƀơi kual plơi pla. Hơdôm gruh rông akan ƀơi ia rơsĭ khut khăt ƀu hơmâo pô dŏ glăi ôh. Nao pơ ƀut plơi Từ Nham, ơi Đỗ Hữu Huy, Kơ-iăng khua Ping gah tơring čar Dak Lăk krăo lăng hơdôm anih hơmâo ia blai đĭ, nao čuă mơnuih ƀôn sang pơ anih dŏ kơđap, hăng git gai ba pơđuăi abih hơdôm boh sang dŏ glăi. Tơring čar Dak Lăk jak iâu mơnuih ƀôn sang anăm pơwơ̆t glăi pơ sang ôh lơ̆m aka ƀu ưt kơthel; ngă tui hơnal kŏm tơbiă hyu pơ ia rơsĭ hăng kiăo tui tơlơi pơtô mơ̆ng anom apăn bruă, pơhlôm rơnuk rơnua tơlơi hơdip ană mơnuih amăng 48 mông kơthel kơtang.

Yap truh yang hrơi dong lơ 6/11, đơ đam tơring čar Gia Lai hơmâo ngă giong laih pơdŭ đuăi mơnuih ƀôn sang 100.000 boh sang anŏ, brơi nao dŏ pơ anih rơnuk rơnua hloh. Hơdôm rơtuh boh sang hră, sang gru grua plơi pla, sang bruă kơnuk kơna dưi ba yua brơi mơnuih ƀôn sang nao dŏ kơđăp kơthel. Djop sang kho hơjai pơprong dưm gơnam ƀong huă, sang sĭ mơdrô ia săng, sang ia jrao ăt pok bah amăng amra sĭ mơdrô brơi mơnuih ƀôn sang blơi, sang bruă apui lơtrik, sang dăng kông, bruă ia jrao khom mă bruă hrơi mlam kiăng hơmâo mơnuih mă bruă na nao djop mông, djop anih hŭi hơmâo tơlơi či kiăng lĕ djru ba pơgang tơlơi suaih pral hăng anŏ či kiăng mơ̆ng mơnuih ƀôn sang. Ƀơi anăp kơ tơlơi tơnap tap hŭi rơhyưt mơ̆ng kơthel, ơi Phạm Anh Tuấn, Khua jơnum min mơnuih ƀôn sang tơring čar Gia Lai, khua git gai phun nao pơ anăp, pơsit bruă ngă hnơ̆ng 5 ƀơi 58 boh să, phường amăng kual ngŏ tơring čar Gia Lai, tơring čar Bình Định hơđăp. Tơlơi kiăng ngă lĕ khom sa hnơ̆ng,  khom pơgang tơlơi hơdip mơnuih ƀôn sang yơh phun, blung hlâo hloh, ƀu lui mơnuih ƀôn sang dŏ glăi amăng anih hŭi rơhyưt ôh. Djop mơta tơlơi hơgĕt či truh yua ngă amưng, pô ngă khua tơring čar, plơi pla anun yơh pô glăm ba tơlơi soh.

Thun anai, neh met wa ƀơi kual ia rơsĭ Khánh Hòa răng kơđiăng laih. Rơbêh 42.000 anih rông akan hăng hơdôm rơbâo čô mơnuih mă bruă pơ kual tong wing Vân Phong hăng ia rơsĭ Nha Trang hơmâo tơlơi pơtrun nao dŏ hăng kơdư laih. Lu sang anŏ akă hĭ kjăp gruh rông akan hăng hrĕ kap prong, pŏng kjăp, kal khoă abih rơnưh wai lăng akan, tap năng “pơtrăm hĭ jăng jai” rơkĭ amăng ia dlăm, hŭi ia rơsĭ tơglăk kor đuăi.

Ƀơi 6 tơdrun mă akan, tơdrun jưh ƀat tô song nan ter hang ia rơsĭ, năng ai 5.000 boh ƀat tô akan jưh pơ hang laih. Amăng tơring čar, 9 grup mă bruă gưl tơring čar hơmâo Jơnum min mơnuih ƀôn sang tơring čar Khánh Hòa akŏ pơdong, trun nao pơ anih amuñ bưp tơlơi truh, git gai pel ĕp, hăng pơtô pơgang kơthel. Mơnuih apăn bruă hơmâo jai krăi lăng rơnuk rơnua pơ dơnao ia, apui lơtrik, glông telephôn pơhiăp nao rai, prăp lui hlâo rơdêh, măi mok, gơnam yua, mơnuih mơnam či pơgang hơjan prong, ia dăo, lŏn tơhlŏm, pơhlôm rơnuk rơnua kơ mơnuih ƀôn sang./.