Prăk man pơdong 7 boh sang hră anai lĕ 1.516 klai prăk, man pơdong phrâo 212 boh anih hrăm hăng hơdôm anih jơnum, anih kiăng yua yom pơkŏn. Ring bruă amra djru brơi bruă hrăm hơđong kơ rơbêh 7000 čô čơđai sang hră pơ guai tơring čar Gia Lai, lu biă ñu lĕ čơđai djuai ania ƀiă. Pơhiăp ƀơi mông pơphun man pơdong, Kơ-iăng khua dêh čar ơi Hồ Quốc Dũng lăi kơčăo bruă anai yom biă mă hăng guai dêh čar, djru pơđĭ tui mơnuih mă bruă rơgơi, hơkrŭ kjăp gum pơgôp djuai ania hăng bong kjăp rơnuk rơnua pơgang lŏn ia. Kơ-iăng khua dêh čar ơi Hồ Quốc Dũng kiăng tơring čar Gia Lai prăp lui tong ten, wai lăng hăng man pơdong tañ, man pơdong klă. Laih dong, kiăng Ding jum pơtô hăng pơjuăt tañ čih pơkra tơlơi pơkôl pơkă, tơlơi djru kơ čơđai sang hră djuai ania ƀiă, biă ñu lĕ hơdră bơdjơ̆ nao anih dŏ, nao rai, hrăm hră.

Ăt amăng hrơi tom brơi (16/11), Jơnum min mơnuih ƀôn sang tơring čar Quảng Ngãi pơphun man pơdong 4 boh sang hră kơnuk kơna čem rông ba pơlir gưl I, II ƀơi hơdôm boh să giăm guai Dục Nông, Sa Loong, Rờ Kơi hăng Mô Rai. Đĭ pơhiăp amăng mông ngă lơphet pok man pơdong, Kơ-iăng Khua dêh čar ơi Nguyễn Hòa Bình lăi pơtong, hơdôm ring bruă anai ƀu djơ̆ kơnong lĕ anih hrăm hră brơi ƀing čơđai đôč ôh mơ̆ lĕ anih pơƀuh brơi pran đăo gơnang, pran hrưn đĭ hăng gum pơgôp kơplah wah kual dơnung hăng čư̆ siăng, kơplah wah mơnuih ƀôn sang đơ đam dêh čar hăng kual giăm guai.

Bruă man pơdong hơdôm boh sang hră pơlir djop gưl ƀơi kual giăm guai amăng tơring čar Quảng Ngãi lĕ bruă mă yôm phăn, pơdah tơlơi glăm ba mơng Ping gah, kơnuk kơna hăng bruă pơtô pơjuăt ƀơi kual ataih, asuek, kual giăm guai.