Jơnum lăi pơthâo hơdôm tơlơi ba truh kơ bruă dưm dăp glăi, pơplih phrâo hơdôm boh kông ti ngă hmua, wai lăng glai ƀơi Dak Lak aka ƀu ngă tui djơ̆ bruă jao. Tui anun, sa, dua hơdră, tơlơi pơkă dŏ phara, kơƀah, ngă bơbeč nao hơdôm anom bơwih ƀong sĭ mơdrô hăng mơnuih arăng jao lŏn. Bruă djă pioh hră pơ-ar bơdjơ̆ nao lŏn mơnai, kơ glai rưng aka ƀu klă, aka ƀu djơ̆ hăng tơlơi rơkâo sit nik. Hơdôm boh kông ti ngă hmua, wai lăng glai aka ngă tui klă bruă wai pơgang lŏn mơnai glai rưng arăng jao. Sa, dua boh kông ti brơi hơdôm khul grup, mơnuih yua lŏn apah lơm aka ƀu hơmâo tơlơi črâo trun mơng tơring čar.

Bruă pel ĕp glăi lŏn mơnai kiăng jao glăi ƀon lan wai lăng ngă aka ƀu lăp djơ̆, anun ƀuh ƀom kiơng na nao. Ơi Nguyễn Đình Trung, Khua git gai Ping gah tơring čar Dak Lak brơi thâo, bruă dưm dăp, pơplih phrâo hơdôm boh kông ti ngă hmua, wai lăng glai amăng hrơi blan rơgao aka ƀu djơ̆ hăng hơnong pơkă ba tơbiă mơng tơlơi pơtrun mrô 30 thun 2014 mơng Ding jum kơđi čar. Tơring čar kiăng lăng nao tong ten bruă mă mơng hơdôm boh kông ti ngă hmua, wai lăng glai kiăng hơmâo hơdră pơsir hĭ hăng hơmâo tơlơi lăi pơthâo tong ten mơ-it nao Ding jum kơđi čar, Kơnuk kơna, Birô Khua pơ ala mơnuih ƀôn sang dêh čar.