Hăng pran jua khŏm ngă giong hlâo kơ akŏ bruă, mơ̆ng lơ 4/5 truh lơ 19/9/2023, Anom bruă apui lơtrik Ea H’Leo hơmâo akŏ pơdong grup ngă bruă, jao bruă kơ ƀing mă bruă, pơphun ngă kah hăng: plih kơthung kông tơ, kap pơmut hăng tơbiă mơ̆ng kông tơ, Aptomat, dăp ming, pơƀut hrĕ, jah mrok, kyâo hơ-um pơging hrĕ apui...

Mah ayuh hyiăng ƀu lăp ôh, hơjan sui hrơi ngă tơnap kơ kông ñơn ngă bruă, pơ kual ataih, asuek, jơlan nao rai tơnap, samơ̆ anom bruă ăt gir ngă giong bruă pơkra glăi măi mok jŭ yap apui lơtrik, laih dong hăng bruă yañ pơkra hĭ tơlơi răm rai yua ayuh hyiăng ngă kah hăng jôh gong apui, tơhlŏm gong apui lơtrik...Bruă pơkra tañ giong jing ngă hiam anih anom, rơnuk rơnua apui yua, plai ƀiă huač apui, brơi apui yua rơnuk rơnua hơđong kơ giăm 39.000 čô tuai yua apui ƀơi tơring glông.