Rơbêh mơkrah blan rơgao, Festival bơnga Đà Lạt tal 9 thun 2022 hơmâo pơphun hăng hơdôm hơdră ngui ngor mơak ƀơi Bảo Lộc, Đà Lạt hăng lu tơring glông ieo gah, amăng anun lu biă mă ñu ƀơi Đà Lạt. Kiăng djop brơi tuai hyu ngui, pơdơi pơdă, abih bang sang sĭ mơdrô bơwih bơwăng kơ tuai amăng tơring čar hơmâo ming pơkra glăi klă, ba lu hơdră bơwih brơi kơ tuai hyu ngui ĕp lăng hăng mă yua. Hrom hăng pơđĭ tui boh tŭ yua bruă mă, bruă pơkă nua gơnam sĭ mơdrô, pơgang rơnuk rơnua, hơđong jơlan glông ăt hơmâo djop anom bruă kơnuk kơna đing nao.

Tơring čar Lâm Đồng ră anai hơmâo rơbêh 3000 boh sang jưh tuai pơdơi pơdă, hăng rơbêh 38 rơbâo anih pit đih pơdơi, djop brơi kơ 75 rơbâo wơ̆t tuai hyu ngui pơdơi pơdă hrơi hăng mlam, amăng anun kơnong plơi prong Đà Lạt lĕ pơsir brơi anih tuai pơdơi pơdă 60 rơbâo wơ̆t sa hrơi, aka yap ôh anih pơdơi amăng sang anŏ mơnuih ƀôn sang brơi apah dŏ Homestay, anih pơdơi amăng sang đang hmua nua rơgêh. Yua kơ anun, amăng mông pơphun Festival bơnga Đà Lạt tal 9 ăt kah hăng hrơi pơdơi thun phrâo, ngă yang thun phrâo djuai ania pơ anăp, Đà Lạt-Lâm Đồng amra ƀu kơniă anih dŏ kah hăng hơdôm thun hlâo ôh.