Ƀơi tơring glông Lạc Dương, amăng blan 11 anai amra pơphun 3 jơlan hơdră hluai tui Festival bơnga Đà Lạt tal 9 thun 2022. Sit biă ñu, lơ 19/11, amra pơphun hrơi ngui bơnga rơk mriah Lang Biang. Ƀơi anai amra dưm dăp 5 anih hyu lăng mơng hơdôm anom bruă bơwih brơi tuai čuă ngui, laih dong pơphun hơdôm tơlơi ngui sô hơđăp, bruă mă mơng Team Building bơdjơ̆ nao bruă mă tui gru grua mơng mơnuih djuai anai K’ho. Lơ 26/11, ƀơi să Dă Nhim amra pơphun ngui tơnă hơbai hăng kŏng tơpai Lang Biang tal I, hơmâo 6 grup mut hrŏm. Ăt amăng tal anai mơn, ƀơi anai amra pơphun ngui brô̆ pơkiăo aseh tal I, hơmâo ruah mơng 32 drơi aseh mơng 6 boh să, tơring kual hăng hơdôm anom bruă amăng tơring čar. Ơi Sử Thanh Hoài, Khua Jơnum min mơnuih ƀon sang tơring glông Lạc Dương, tơring čar Lâm Đồng brơi thâo: bruă prap lui 3 jơlan hơdră Festival bơnga Đà Lạt tal 9 thun 2022 hơmâo pơgiong abih laih.

“Ngă tui tơlơi črâo trun mơng Jơnum min mơnuih ƀon sang tơring čar kơ bruă hơdôm boh ƀon lan amăng tơring čar mut hrŏm amăng hơdôm jơlan hơdră kiăng pơhlôm tui Festival bơnga Đà Lạt, tơring čar Lạc Dương ăt hơmâo sa, dua bruă mă kiăng kơ mut hrŏm. Anai lĕ ngui ƀơi đang bơnga rơk mriah him lăng pơphun amăng lơ 19/11, hrŏm hăng anun lĕ tơring glông Lạc Dương ăt pơphun ngui tơnă hơbai, atông čing hring hơgor, gum hrŏm hăng hơdôm anom bơwih ƀong sĭ mơdrô pơphun ngui brô̆ pơkiăo aseh ƀơi să Dă Nhim”.

Ră anai, hơdôm anom bruă bơwih brơi tuai čuă ngui anun lĕ, sang mơñum ƀong, sang jưh tuai, hơdôm anih hyu čuă ngui…ƀơi Lâm Đồng ăt hơmâo prap lui hơdôm tơlơi gal hloh kiăng pơhlôm brơi kơ tuai čuă ngui. Ơi Đinh Thiên Long, sa boh sang mơñum ƀong amăng plơi prong Đà Lạt brơi thâo, kiăng kơ mut hrŏm Festival bơnga Đà Lạt tal anai, rơngiao kơ bruă hrưn đĭ klă dong amăng bơwih bơwang, sang mơñum ƀong, hơmâo đing nao prap lui sa, dua gơnam ƀong jơman tơbă hơbai mơng hơdôm añăm tam, hơbơi pơtơi mơng plơi prong Đà Lạt.

“Hlâo kơ Festival, bruă blung hlâo lĕ ƀing gơmơi ngă pơgiong gơnam yôm mơng sang mơñum ƀong amăng bơwih brơi gơnam ƀong kơ tuai, pơhlôm hiam hơdjă pioh čơkă tuai lu hloh. Đà Lạt lu djuai añăm tam, yua anun tuai amra dưi ƀong lu gơnam mơng mơnuih ƀon sang plơi prong bơnga”.

Ơi Tôn Thiện San, Khua Jơnum min mơnuih ƀon sang plơi prong Đà Lạt, Khua khul pơphun Festival bơnga Đà Lạt tal 9 brơi thâo, hơdôm plơi pla bơnga, đang bơnga ƀơi Đà Lạt lêng kơ pơhlôm brơi bơnga hiam hloh, kiăng pơhưč tuai hyu čuă ngui.

“Đà Lạt pơsit tong ƀu djơ̆ kơnong Festival bơnga kah hơmâo bơnga, mơ̆ Đà Lạt lĕ plơi prong bơngan yua anun bơnga bluh đĭ djop bơyan, hlơi hlơi lêng kơ pla bơnga, djop sang anŏ lêng hơmâo bơnga. Hơdôm plơi pla bơnga thun anai ăt hơmâo bơngan brơi kơ tuai čuă ngui, pơhmutu lĕ plơi bơnga Vạn Thành dưi nao lăng amăng yang hrơi mlăm. Sa, dua jơlan hơdră Festival bơnga amra pơphun truh Tết, hăng amra pơphun bơnga na nao kiăng kơ lăng hiam. Yua anun, rơngiao kơ jơlan hơdră “Anih hiam ƀơi Dap kơdư” pơphun amăng sui hrơi, hơdôm anih dưm bơnga amra sui truh hrơi ƀong Tết”.

Kar kăi hăng hơdôm tal Festival bơnga hlâo anun, Festival bơnga Đà Lạt tal 9 anăp nao hơnong pơkă mơnuih mơnam, yua anun lu bruă mă amăng hơdôm jơlan hơdră hơmâo hơdôm anom bơwih ƀong sĭ mơdrô, khul grup, ƀing mơnuih čih anăn ngă tui. Tui ơi Đặng Trí Dũng, Kơ-iăng Khua Jơnum min mơnuih ƀon sang tơring čar  Lâm Đồng, Kơ-iăng Khua khul git gai jơlan hơdră Festival bơnga Đà Lạt, truh ră anai hơdôm jơlan hơdră lêng kơ pok pơhai ha amăng plĕ hăng djơ̆ hrơi mông pơkă, pơhlôm sa bơyan Festival bơnga truh kih hăng pơđŏm glăi lu tơlơi hiam klă amăng pran jua tuai čuă ngui. Mơng anun, pơgôp pơtrut kơtang bruă bơwih brơi tuai čuă ngui hăng hrưn đĭ tơlơi hơdip mơda kơ mơnuih ƀon sang.

“Truh ră anai lăp djơ̆ hăng tơlơi rơkâo kah hăng akŏ bruă ba tơbiă, wŏt hrơi mông pơkă, boh tơhnal hăng bruă prap lui ječ ameč. Khul git gai, khul pơphun hăng 4 grup lêng pok pơhai bruă mă ječ ameč. Festival bơnga thun anai pok pơhai ha amăng plĕ djop anih, đa hơmâo bruă tơdơi kơ Festival kah tŏ tui pok pơhai, bơwih brơi tuai; samơ̆ hơmâo hơdôm boh tơhnal, pơhmutu jơlan hơdră pơdă prưng anŏ hiam hơmâo pơđŏm glăi amăng pran jua tuai čuă ngui hăng hơdôm anŏ hiam mơng Đà Lạt, mơng Lâm Đồng, kơ ană mơnuih, gơnam tam amăng anun hơmâo bơnga”.

Hăng anăn “Đà Lạt - plơi prong bơnga bluh djop bơyan”, Festival bơnga Đà Lạt tal 9 thun 2022 pơphun dong mơng blan 11 truh abih blan 12 hăng lu anih ƀơi hơdôm tơring glông, plơi prong amăng tơring čar. Hrŏm hăng 9 jơlan hơdră phun hơmâo: Anih dưm bơnga, jơlan hơdră ngui adôh suang “Bảo Lộc Hương trà, sắc tơ”, jơlan hơdră ngui yôm phăn lăi pơthâo Festival bơnga Đà Lạt tal 9 thun 2022, ngui duh eng ao hiam “Hrĕ mrai - Jơlan ba glăi tơlơi yôm phara” hăng pơdă prưng “Anih hiam ƀơi Dap kơdư”, pơdă prưng bơnga hăng hơdôm phun bơnga mơng jar kmar, jơnum pok pơhai jơlan hơdră bruă mă mơng Kơnuk kơna ngă tui tơlơi pơtrun mrô 23 mơng Ding jum kơđi čar kơ hơdră anăp nao pơđĭ kyar bơwih ƀong huă mơnuih mơnam, pơhlôm rơnuk rơnua amăng kual Dap kơdư truh thun 2030, anăp nao truh thun 2045 hăng pơsur tuh pơ alin ƀơi kual Dap kơdư.