Ƀơi mông bưp, mơnuih ƀôn sang rơkâo kiăng tơring čar tuh pơ alin man pơdong anih anom, jơlan nao rai pơ bul pơtâo Hải Minh; apui lơtrik amăng atur lŏn ƀơi hơdôm boh plơi prong kiăng plai ƀiă răm rai yua hơjan kơthel ngă; pơtrut tañ bruă pơhrup hiam plơi prong, pơgang ba ayuh hyiăng ia rơsĭ hơdjă, agaih; laih anun pơhlom rơđah rơđông amăng bruă dăp glăi sang hră tơdơi kơ pơmut hrŏm. Lu tơlơi pơgôp hiăp ăt kiăng tơring čar hơmâo hơdră đĭ kyar čơkă tuai nao hrŏm hăng pơhlom rơnuk rơnua laih anun pơđĭ tui anŏ klă tơlơi hơdip mơnuih ƀôn sang.

Pơhiăp hăng mơnuih ƀôn sang, Khua jơnum min mơnuih ƀôn sang tơring čar Gia Lai ơi Phạm Anh Tuấn pơsit, tơring čar amra djru ngă pơgiong jơlan nao rai, anih anom hiam ƀơi hơdôm kual hơmâo lu mơnuih juăt nao, khŏm pơhlom rơnuk rơnua kơ mơnuih ƀôn sang hăng đĭ kyar hơđong kjăp. Laih dong, pơkra, pơhrup hiam brơi plơi prong, ƀơi akiăng jơlan hơmâo pơplih glăi kiăng hơđong hloh mơn, pơgang ba ia rơsĭ kiăng hơdjă, hiam, laih anun akŏ pơdong Quy Nhơn jing plơi prong čơkă tuai hyu ngui rơgơi, rơnuk rơnua, thâo ƀu-eng kơ tuai rơnguai, amăng anun mơnuih ƀôn sang gum ngă yơh yom hloh./.