Amăng anun, lăp đing nao lĕ Hră pơtrun kơ Akŏ bruă pơđĭ kyar bơwih ƀong huă-mơnuih mơnam, pơhlom rơnuk rơnua dêh čar, hơđong lŏn ia ƀơi tơring čar Dak Lak mơ̆ng thun 2026-2030. Hră pơtrun hơmâo pơtong glăi tơhnal pơkă man pơdong Dak Lak jing tơring čar pơđĭ kyar hmar amăng lŏn ia; jing anih phun bơwih ƀong huă kual Dap Kơdư, logistics, bruă ia jrao, pơtô hrăm, tuai čuă ngui, gru grua hiam, pơrơguăt drơi jăn hăng kơsem min boh thâo ia rơgơi phrâo amăng kual ter hang ia rơsĭ Dơnung tong krah hăng Dap Kơdư.

Hră pơtrun ăt pơtong rơđah 5 anăp ngă bruă kơtang hloh, čih pơkra djop hră pơtrun hăng man pơdong atur ngă bruă rơnuk phrâo; pơtum nao boh tơhnal mơ̆ng bruă pơđĭ kyar phun; mă boh thâo ia rơgơi phrâo, pơblih pơčeh phrâo anun ba yua mrô kiăng pơtrut kơtang bruă mă pơđĭ kyar anih bơwih ƀong huă gah Dơnung Phú Yên, plơi prong Ƀuôn Ma Thuôt hăng hơdôm anih jĕ giăm ieo gah bơwih ƀong huă, pơtrut bơwih ƀong huă đĭ kơtang amăng kual yua mơnuih ƀôn sang ngă pô, bơwih ƀong mơtah mơda, ba yua mrô, bơwih ƀong amăng kual ia rơsĭ hăng tuh tia pơkra ming tong ten.