Amăng hơdôm bơbung drông mơnŭ ƀơi plơi Đoàn Kết, să Tân Hội, tơring čar Lâm Đồng, arăng dưm lu pil hrĭp pơ-iă yang hrơi. Amăng lăm, mơnŭ rông tui hơdră sir klĕp; boh mơnŭ tơdơi kơ duñ pơƀut, ruah pơčlah hăng anung amăng adung hơmâo wai lăng tong ten anih rông hăng mrô QR.

Anai lĕ hơbô̆ bruă “Boh mơnŭ hiam hơdjă” mơng sa boh anom bruă sĭ mơdrô, pơlir hăng yua apui lơtrik phrâo, boh thâo sinh học, pơplih mrô hăng bơwih ƀong rô nao rai. Apui lơtrik hrĭp pơ-iă yang hrơi ngă plai ƀiă prăk duh; phun kyâo jrao hăng djah djâo hơmâo pơhrua amăng gơnam ƀong brơi hlô rông; eh, djah djâo mơng hlô rông hơmâo pơkra jing kmơk hơdjă. Ơi Phạm Trọng Tâm, Khua anom bruă sĭ mơdrô brơi thâo, ñu glăk pơjing bruă bơwih ƀong tong ten, mơtah hăng ba glăi nua lu ƀiă: “Ƀing gơmơi ƀu djơ̆ sĭ kơnong sa asar boh mơnŭ đôč ôh mơ̆ sĭ brơi tơlơi đăo gơnang hăng boh thâo phrâo, hrưn đĭ tơlơi yôm mơng boh mơnŭ, pơhlôm brơi tơlơi suaih pral mơnuih mơnam hăng đĭ tui rơnoh amăng bơwih ƀong huă".

Hơbô̆ bruă ƀơi Tân Hội brơi ƀuh, yua boh thâo phrâo amra ba glăi rơnoh yôm lơm boh than kơsem min hơmâo mă yua amăng bơwih ƀong huă, sĭ mơdrô hăng hơmâo anih blơi yua tŭ mă. Anai ăt lĕ pran jua ngă tui tơlơi pơtrun mrô 57 hơmâo pơdah tong ten mơng hơdôm tơlơi sit nik ƀơi Lâm Đồng lơm pơplih mơng kơsem min hajan hơdai nao pơsir hĭ hơdôm tơlơi rơkâo tong ten amăng bơwih ƀong huă. Hăng ngă hmua, hrŏm hăng kual pla pơjing, mrô kual pla hăng anih anung gơnam, tơring čar ăt kiăng pơgiong bruă pơkra anih dưm gơnam rơ-ơ̆, logistics, răk pioh, pơčrang lăng hăng pơsir hĭ tơdơi kơ pĕ pơhrui kiăng đĭ tui nua gơnam tam.

Amăng rơwang thun 2026-2027, tơring čar Lâm Đồng ba tơbiă hơnong pơkă djru brơi ƀiă biă mă ñu 20 bruă jao kơsem min hăng pơplih yua boh thâo phrâo, 20 hră pơkôl kơsem min-pơđĭ kyar, 30 boh anom bơwih ƀong sĭ mơdrô pơplih yua boh thâo phrâo hăng 300 anom bơwih ƀong anet hăng man ƀrô pơplih mrô; laih dong pơjing 3 hơbô̆ bruă ngă hrŏm amăng kơsem min, mă yua hăng sĭ mơdrô gơnam măi mok phrâo.

Kiăng hơdôm hơnong pơkă anai ba glăi tơlơi yôm sit nik, hơmâo anih pơmut nao rai mơng kual pla, đang hmua truh pơ anih pơkra hăng sĭ mơdrô kiăng pơlir nao ra. Ơi Nguyễn Ngọc Phúc, kơ-iăng Khua Jơnum min mơnuih ƀon sang tơring čar Lâm Đồng brơi thâo, ƀon lan glăk đing nao yua boh thâo ia rơgơi kiăng hrưn đĭ tŭ yua amăng bruă bơwih ƀong, pơgiong glông rơnoh hăng đĭ tui pran bơkơtưn. “Lâm Đồng hơmâo lu tơlơi gal prong amăng ngă hmua yua boh thâo phrâo, pơkra gơnam đang hmua, apui lơtrik phrâo. Kơ bruă yôm phun lĕ kiăng pơlir hơdôm ngăn rơnoh kiăng pơjing bruă ngă hrŏm tong ten, pơjing rai gơnam phrâo, boh thâo phrâo, hơdră ngă bruă phrâo, ba glăi rơnoh sit nik brơi mơnuih ƀôn sang, anom bruă sĭ mơdrô hăng tơlơi bơwih ƀong huă amăng tơring čar pơđĭ kyar dua mrô, hrưn đĭ mrô bơkơtưn gưl tơring čar”.

Mơng hơbô̆ bruă rông mơnŭ hiam hơdjă ƀơi Tân Hội truh pơ bruă pơgiong glông rơnoh hăng pơplih mrô, Lâm Đồng glăk ƀơƀrư̆ ba tơlơi pơtrun mrô 57 mut amăng tơlơi hơdip sit nik, yua boh thâo phrâo, boh thâo măi mok hăng pơplih pơčeh phrâo jing tơlơi pơtrut pơđĭ kyar bơwih ƀong amăng tơring čar./.