Khua pơ ala mơnuih ƀôn sang dêh čar pơsit, Việt Nam leng kơ lăng čar Mi jing sa amăng hơdôm boh dêh čar ngă gŏp yom biă mă; bơni kơ hơdôm tơlơi đĭ kyar prong, rơgao kơ tơlơi čang rơmang mơ̆ng tơlơi rô nao rai ngă gŏp hlom bom abih bang Việt Nam hăng Mi ƀơi djŏp bruă mă amăng thun blan rơgao. Khua pơ ala mơnuih ƀôn sang dêh čar rơkâo Khua anih jưh yă Jennifer Wicks pơtrut tui tơlơi gơgrong pơtruh brơi, ngă hrŏm hăng Việt Nam pơđĭ tui hloh bruă pơbưp khua mua djŏp gưl, biă ñu lĕ khua mua pơprong; kiăng pơtom hiăp na nao, sit nik plah wah anom bruă čih pơkra tơlơi phiăn dua boh dêh čar.

Tŭ ư hăng Khua pơ ala mơnuih ƀôn sang dêh čar ơi Trần Thanh Mẫn, yă Jenifer Wicks lăi, boh tŭ yua ba glăi mơ̆ng tơlơi rô nao rai ră anai hơmâo tơlơi pơgôp prong biă mơ̆ng dua Ƀirô khua pơ ala; lăng yom biă hơdôm boh tŭ yua hmư̆ hing amăng bruă ngă hrŏm plah wah dua Ƀirô khua pơ ala mơnuih ƀôn sang dêh čar thun blan rơgao. Khua anih jưh pơsit, amra ngă hrŏm kjăp hăng ding jum, anom bruă Việt Nam, či pơtrut tui pơbưp khua mua ƀơi djŏp gưl, djŏp anih; tŭ ư bruă dua bơnah kĭ ngă pơgiong hră pơčrông sai, kĭ pơkôl sĭ mơdrô djru nao rai, bơkơnar, klă kơ dua bơnah; lăi dlăm bruă pơtrut ngă hrŏm amăng bruă phrâo hơmâo, amăng anun gah čar Mi lăp đing nao ngă hrŏm apui yua, boh thâo ia rơgơi, boh thâo mrô; tŭ ư hăng lok glăi tơlơi ƀuăn pơtrut ngă hrŏm ming pơkra tơlơi truh sat răm mơ̆ng rơnuk blah ngă đưm pioh glăi./.