Tal rai čuă jơmư anai, hmâo boh tŭ yua yom biă mă lơ̆m dua bơnah pơphun jơnum hơdor glăi 50 thun akŏ pơjing bruă pơtom hiăp, giăng mah Việt Nam-Thai Lan, djru pơtrut bruă ngă giăng mah pŭ ƀăn yom phara plah wah Việt Nam hăng Thai Lan, jai hrơi kơjăp tui, tŭ yua hloh. Dua čô khua ăt tŭ ư hrŏm pơtrut tơlơi đăo kơnang nao rai kơđi čar, kơnang bruă brơi bưp nao rai khua mua pơprong djop gưl; pơđĭ tui boh tŭ yua djop tơlơi pơkă, bruă ngă hrŏm yom, kah hăng jơnum hrŏm dua bơnah kơnuk kơna yua Khua dêh čar dua bơnah pô pơphun git gai; hơdai gum hrŏm pok pơhai tŭ yua jơlan hơdră či ngă amăng bruă giăng mah dua bơnah hlom bom kơjăp phik Việt Nam-Thai Lan črăn mơ̆ng thun 2026-2031 hăng lu boh tơhnal rơđah rơđong amăng bruă pơgang lŏn ia, rơnuk rơnua dêh čar, bơwih ƀong huă, kơsem min ia rơgơi, boh thâo phrâo, gru grua hiam hăng tuai čuă ngui, jĕ giăm mơnuih ƀôn sang.

Dua čô khua tŭ ư pơtrut pơđĭ kyar ngă tui bruă mă yom anăn “Klâo mơta pơtruh nao rai”, kơtưn ngă hrŏm lu ruăi ba gơnam sĭ mơdrô, djru sang bruă mơdrô, tơring čar hăng lu bruă ngă hrŏm kơjăp tong ten; ba yua klă hloh jơlan ter bơwih ƀong huă nao mơ̆ng Ngŏ-truh pơ Yŭ juăt lăi jơlan Ngŏ-Yŭ hăng jơlan ter gah Dơnung; pok pơhư prong jơlan nao rai ƀơi lŏn hang, jơlan rơdêh por hăng jơlan ia rơsĭ; pơsur sang bruă mơdrô dua bơnah pok prong tuh pơ alin, pơđĭ boh tŭ yua mơ̆ng Tơlơi phiăn Jơnum min ngă hrŏm sĭ mơdrô Việt Nam-Thai Lan, gir kiăng tañ ngă djơ̆ tơhnal pơkă pơhrui glăi prăk sĭ mơdrô mơ̆ng dua bơnah lĕ 25 klai USD, anăp nao kiăng pơhrui glăi truh 50 klai USD kiăng ngă bơkơnar hăng kơjăp.