Khul apăn bruă Ping gah tơring čar Gia Lai hơmâo bơtŭ ư kơ bruă pok pơhai hơdôm hơdră bruă phara tui tơlơi pơtrun mrô 72 mơng Ding jum kơđi čar kiăng kơtưn wai pơgang, bơwih brơi hăng pơhlôm pơgang brơi tơlơi suaih pral mơnuih ƀôn sang. Amăng anun yôm hloh lĕ akŏ bruă tuh pơ alin giăm 300 klai prăk brơi anih anom ia jrao ƀơi kual giăm guai, kual tơnap tap amăng tơring čar Gia Lai. Tơring čar Gia Lai him lăng đing nao tuh pơ alin man pơdong, pơkra ming hăng blơi gơnam măi mok brơi 24 anih anom ia jrao ƀơi kual giăm guai, kual tơnap tap.

Hơdôm anih kiăng pơkra anun lĕ pok prong anih pơjrao, man pơdong phrâo hơdôm anih đăo lăng hăng rup rap, pơčrang lăng, siêu âm, pơjrao ječ blung a, đing pơđoh đuăi ia djah hăng hơdôm ring bruă bơdjơ̆ nao. Abih tih prăk mă yua brơi jơlan hơdră anai him lăng giăm 288 klai prăk, amăng anun 216 klai prăk brơi kơ bruă pơkra ming, pok prong anih anom hăng giăm 72 klai prăk kiăng blơi gơnam măi mok anun lĕ măi siêu âm, mă pơčrang lăng, gơnam yua pơjrao ječ hăng pơgang kman. Hrŏm hăng tuh pơ alin blơi gơnam măi mok, tơring čar Gia Lai ăt rơkâo pok pơhai hơdră khăm pơjrao soh sel tui tơđar brơi mơnuih ƀôn sang ƀơi 12 boh să giăm guai, bul pơtâo hăng kual tơnap tap hloh.